СЕТАМӦЙ КРЕСТЬЯНАЛЫ ТУЙДӦД

Тӧрытсянь миян, Коми обласьтын, заводитчис мунны кык вежон чӧж чукӧртны быдсяма пӧлӧс справочнӧй гижӧд: законъяс, протоколъяс, съездъясвывса резолюцияяс, циркуляръяс, мукӧдтор.

Ставсӧ татшӧм гижӧдъяссӧ, кодлӧн эм, колӧ сетны тайӧ кык вежон чӧжнас лыддьысян керкаясӧ. Сэні колӧ лӧсьӧдавны ӧні жӧ бюрояс. Уездъясын, библиотекаясын, — уезднӧй комиссияяс. Став уджсӧ кутас нуны обласьтувса библиотека.

Тайӧ уджыс вӧчсьӧ сы вӧсна, медым быд лыддьысян керка вермис сетны крестьяналы быдсяма справка, туйдӧдны найӧс быдтор йылысь. Медым быд лыддьысян керкаысь крестьянин аддзис: кутшӧм закон серти мый вермӧ вӧчны крестьянин.

Быд организация, учрежденньӧ, профсоюзлӧн да партиялӧн ячейка, весиг торъя войтыр, кодлӧн эмӧсь сэтшӧм гижӧдъясыс, медым сетасны сійӧс лыддьысян керкаясӧ, библиотекаясӧ — Сыктывдінкарын Центральнӧй Библиотека пондас босьтавны татшӧм гижӧдъяссӧ быд лун — 4 чассянь 7 часӧдз рытнас.

Сэсся, таысь ӧтдор, колӧ та йылысь сёрнияс сувтӧдны собранньӧяс, конференцияяс вылӧ.

Медым ӧтик справочнӧй гижӧдтор эз весь куйлы, медым вермисны пыр крестьяна сійӧн пӧльзуйтчыны, колӧ ставсӧ сетны лыддьысян керкаясӧ да библиотекаясӧ. Срокыс абу ыджыд, колӧ тэрмасьны.