ПРИВДА ВАСЬКА АЧЫС ОЗ ТӦД

(воча шыасьӧм)

«Югыд туй» газетын (февраль 28-ӧд лунся 47-ӧд №) Привда Васька гижӧма Койгортса олӧм йылысь: йӧзыс пӧ узьӧны, комсомол тшӧтш унмовсьӧма; спектакъяс вылысь пӧ пышйӧны, юӧны, кодалӧны, косясьӧны, том нывъясӧс нӧйтӧны...

Кывзы, гижысь ёрт: тэ Койгортса олӧм йывсьыс, тыдалӧ, нинӧм он тӧд. Оз ков вунӧдны: Койгорт вӧлӧсьт кӧнкӧ Коми му пельӧсас. Миян пемыд олӧм тшӧктӧ мунны водзӧ — ми сэтчӧ надзӧникӧн кыссям, видласигтырйи, кыт-мый колӧ лӧсьӧдігтырйи. Комсомол котыр тані оз узь, сійӧ мунӧ югыдлань Ленин туйӧд. Коді гортас комсомолечыд, сійӧ пыр лыддьысян керкаын.

Том нывъясӧс комсомол оз нӧйт, а нуӧдӧ на костын бур удж. Косьяс кӧ вӧліны арнас, сэн комсомол эз косясь.

Допризывникъясысь ми огӧ пышъялӧй. Койгортса комсомолечьяс тшӧтш уджалісны, велӧдчисны всеобучын; допризывникъяс пӧвстӧ найӧ жӧ восьтісны комсомол фракция.

Вӧліны кӧ миян ячейкаын омӧлик кандидатъяс, ми найӧс вӧтлалам «дубинаӧн».

Ячейкаса секретар И. Старцев.