«ЛЕКАРКА»

Ичӧт Слуда сиктын, Час вӧлӧсьт улын эм Настасся тьӧтка.

Сійӧ кынӧмсӧ вердӧ и став уджсӧ медалӧ йӧзӧс «лечитӧм» вылӧ. Сылы миян сиктса йӧз пуктӧмаӧсь ним «лекарка». Коді тайӧ «лекаркаӧс» оз тӧд? — Сійӧс новлӧдлӧны кӧлӧкӧльчиа вӧлӧн, Сыктывкарӧ катӧдлывлӧны, Слӧбӧдаӧ, Зеленечӧ, новлӧдлӧны вӧлӧн Пожӧг кузя, Пальӧ, От гӧра кузя, Айкинаӧ, дай Емваӧдз нулывлӧны. Кодлӧн мӧскыс «дзугыльтчӧма», кодлы юрас лӧм чеччалӧма, кодлы кытчӧкӧ мыль либӧ чирей петӧма, кодӧс мужикыс оз любит, коді зонкӧд гуляйтӧма, да сэсся зонмыд сійӧс эновтӧма — ставыс локтӧны «лекарка дінӧ» бурдӧдчыны.

Настасся тьӧткалӧн лекарствояс вӧчалӧма быдсяма пӧлӧс турунъясысь да изъясысь. Дерт, лёк турунъястӧ юӧм сёйӧмысь, буракӧ, унакодь висьысь морт кулалӧ, сӧмын сы йылысь некод оз и мӧвпыштлы. Быдсӧн думайтӧны збыльысь лекаркаӧн Настасся тьӧткаӧс. «Бурдӧдалігас» сійӧ висьысь йӧзлы висьталӧ, тайӧ висьӧмыд пӧ морт вӧсна (морт вӧчӧм висьӧм).

Ёна зэв сійӧ пемыд йӧзтӧ эскӧдӧ еретникъястӧ веритны, шеватӧ да, мӧс тшыкӧдӧм да. Ӧти кылӧн шуны — зэв уна лёк вӧчӧ сійӧ коми пемыд йӧзлы. «Бурдӧдӧм» вылас ӧд сійӧ зэв уна босьталӧ: вый, нянь, сарапан, юбка, дӧра, кузьчышъян; тшӧтш и самӧкурысь оз лӧгась.

А пельшӧр миян Час вӧлӧсьтын абу. 1922ʼ воын нин ӧткажитчисны сыысь. А гӧгӧрвоан кӧ мыйкӧ неуна, дерт жӧ, татшӧм Настасся тьӧтка дорсьыд пельшӧрыд коланторджык да.

С-а. С-ӧ.