ЛЁКВИСЬӦМ

Макарыб сиктын (Удораын) Укоммолсянь инструктор да велӧдысь вӧчлісны крестьяна собранньӧ. Собранньӧ вылас велӧдысь зэв бура висьталіс быдсяма висьӧмъяс йылысь, медся нин ёна лёквисьӧм йылысь. Висьталӧм бӧрын бабаяс шуисны, сэтшӧм висьысьясыс пӧ миян эм, сӧмын пӧ огӧ тӧдӧй лючки быдӧнӧс; тӧдам пӧ сӧмын висьысь челядьӧс. Найӧ абу на и тӧдлӧмаӧсь лёквисьӧмлысь ёна быд ног вуджӧмсӧ. Помас крестьяна шуисны: пыр ыстыны Уздравотделӧ бумага, корны сэтысь бур докторӧс, мед сійӧ быдӧнӧс видлалас да висьысьясӧс мӧдӧдас больничаӧ лечитчыны. Доктор висьталӧм серти видзчысьны висьысь йӧзысь, мед висьӧмыс оз паськав водзӧ. Поплы тшӧктыны некодӧс не окӧдны крестӧн ни, евангелльӧӧн ни, ӧбразӧн ни.

Уздравотдел да Обздравотдел! Тіян дінӧ шыасям, видзӧдлывлӧй ылысь пемыд олысьяссӧ, ыстывлӧй тшӧкыдджыка ассьыныд тӧдысь йӧзтӧ. Миянӧс лечитӧны сӧмын кӧнӧвалъяс да «тӧдысь» бабаяс.

Кывзысь.