НЫВБАБА КОСТЫН УДЖ

Сыктыв уездувса Грива вӧлӧсьтын ёна босьтчисны уджавны нывбаба пӧвстын. Овлӧны делегаткаяслӧн собранньӧяс, делегаткаяс волывлӧны учрежденньӧясӧ уджавны. Быд тӧлысьын ӧтчыд овлӧны общӧй собранньӧяс.

Ёна уджалӧны комсомолечьяс нывъяс пӧвстын. Нывъяс бӧръявылыс кутісны пырны комсомолӧ да мукӧд пӧлӧс организацияясӧ: МОПР-ӧ, видз-му уджалан кружокӧ да мукӧдӧ. Комсомолӧ 7 морт нин пырисны.

Ӧні Гриваын восьтісны нывбабаӧс тӧдмалан кружок. Сэні кӧсйӧны велӧдны-тӧдмавны нывбабалысь олӧм-вылӧмсӧ. Сӧмын тайӧ удж бердӧ кутчысьны оз на вермыны: абу на некутшӧм литература. Виччысям туйдӧдӧм да отсӧг уездувса нывбаба юкӧдсянь (уженотделсянь).

Ставмувывса нывбаба лун (март 8 лунӧ) петкӧдліс, кутшӧм ылӧ нывбабаыд кольӧма; сэтчӧдз найӧ эз тӧдлыны ассьыныс лунсӧ. Сійӧ луннас сёрнитісны делегаткаяс удж йылысь, мый налӧн вӧчӧма, кыдзи водзӧ уджавны. Сійӧ лун кежлӧ нарошнӧ лэдзисны стенӧ ӧшӧдан газет «Коми нывбаба» нимаӧс.

Ме ногысь, эськӧ колӧ, мед уездувса нывбаба юкӧд ёнджыка отсасис да туйдӧдіс водзӧ. Ӧнӧдз уездсянь нывбабаӧс босьтчӧдӧм уджӧн некод пӧ эз волы.

Волорганизатор Е. Карманова.