ВОЛСЯЫН

(Сыктыв уезд)

Воддза вояс серти, олӧм заводитчӧ бурмыны. Колян арсянь мунісны нажӧткаяс вылӧ (ёнджыкасӧ вурсьыны) сё вит кымын морт. Тайӧ йӧзыс 1914 восянь косталӧм бӧрын — первой мунысьяс. Кодъяс бӧр нин локтісны, висьталӧны: нажӧтка пӧ воӧ шӧркоддьӧм вурсьысьлы шайт 60−70. Ӧні крестьяна заводитчӧны ньӧбавны видз-му уджалан кӧлуй.

Волисполкомлысь удж кулитны оз позь. Вӧлӧсьтын быд учрежденньӧ удж нуӧдӧм йылысь лыддьысьӧ (сетӧ отчёт) волисполком водзын, а волисполком лыддьысьӧ йӧз водзын. Сэтшӧм докладсӧ вӧчліс исполкомса председатель март тӧлысьын шӧрас кымын.

Мӧда-мӧдлы отсасян комитетын кольӧм воясӧ вӧлі став сьӧмыс сӧмын 114 шайт гӧгӧр. Таво вӧлӧсьтувса съезд шуис содтысьны, лӧсьӧдіс шленӧ пыран дон босьтны 5 пунт сюӧн быд видз-му вот босьтан площадьысь. Деньга лыдӧ кӧ, кайӧ сійӧ 15 урӧн десятинаысь. Ӧні тыдалӧ нин: гӧльджык да шӧркоддьӧм крестьяна пырӧны шленӧ, комитетлӧн содны кутіс сьӧм. Сыысь кындзи сьӧм содтыны отсалісны вичкоысь босьтӧм видзьяс. Сэсся воис отсӧг самӧкур пуан дозмукъяс вузавлӧмысь. Сійӧ кутӧм дозмукъяссӧ милиция да нар. суд сетӧны комитетлы отсалӧм вылӧ. Сэтысь воис шайт 30 гӧгӧр.