ВАЖ ЛЁК НОГА ОЛӦМ КОЛӦ ШЫБИТНЫ

(Гӧрдармеечлӧн письмӧ)

Асланым коми газет пыр воис миянлы юӧр, Паджга вӧлӧсьтувса Гаръя сиктын пӧ том йӧз лӧсьӧдӧмаӧсь РЛКСМ ячейка. Миянлы первойсӧ вӧлі зэв нимкодь, мися, том йӧз миян Гаръяын восьтӧмаӧсь синсӧ, босьтчӧмаӧсь велӧдчыны. Сёрнитам вӧлі ас костын, мися, воам гортӧ да том йӧзкӧд ӧтвылысь ёна и босьтчам уджавны.

Сідз вӧлі первойсӧ. Ӧні локтӧны письмӧясӧн зэв омӧль юӧръяс. Асьныс жӧ комсомолечьясыс гижӧны, юам пӧ вина (дерт кӧнкӧ — самӧкур) да косясям. Со мый дыра и ми нимкодясим...

Оз ӧд, вокъяс, сідзи ков уджавны да велӧдчыны. Ленин ёртлысь кывъяссӧ оз ков вунӧдны; сійӧ шуліс: колӧ пӧ велӧдчыны да велӧдчыны. Косясьлісны войдӧр сар дырйи, ӧні колӧ сійӧ уджсӧ шыбитны. Колӧ тіян ӧтувтчыны да прӧст пӧраӧ велӧдчыны, тӧдмавны газетысь: мый сэні гижӧны, кутшӧм отсӧг вылӧ чуксалӧны.

Ноко висьталӧй миянлы, пыринныд-ӧ кутшӧмкӧ организацияӧ (МОПР-ӧ, ОДВФ-ӧ либӧ мукӧдлаӧ)? Сетанныд-ӧ кутшӧмкӧ отсӧг? Миян тай нӧ тані ставныс отсасьӧны. Сэсся висьталӧй, лыддянныд-ӧ нигаяс, код пыр позьӧ тӧдны: мый керсьылӧма важӧн, кыдз ӧні олӧны? Эм-ӧ тіян кӧть библиотекаыд?

Бур вокъяс, лёка олӧмысь колӧ падмӧдны йӧзӧс, колӧ ёнджыка лыддьысьны да велӧдчыны.

Кывзӧй миянлысь да бурджыка олӧй!