СКӦТ МЕД КУЛӦ, МЕДТЫКӦ «МИКӦЛА МИЛӦСЬТЛИВӦЙ» ЭЗ КЫНМЫ-А

Абъячой вӧлӧсьтын (Сыктыв уездын) колян во тулыснас лэптісны скӧт лечитан больнича (ветеринарная амбулатория). Джодж-пӧтӧлӧксӧ да пытшкӧссӧ вӧчны кольлі вайны 300 кер. Таво февраль тӧлысьын волисполком лӧсьӧдіс вайны быд кык морт вылӧ ӧти керйӧн. Тайӧ керсӧ вайӧны зэв омӧля. Остапов сиктсалы колӧ вӧлі вайны 48 кер. Найӧ ӧтикӧс на весиг эз вайны.

Неважӧн паныдасисны сійӧ сиктсьыс морт кызь кымын, ставныс кер кыскӧны. Юала: «Кытчӧ нӧ керсӧ?» Ставныс воча кыв видзисны: «Микӧла милосьтливӧйӧс шонтыны», часовня вылӧ.

Шыбитӧй пемыдлунтӧ, Остапов сиктса йӧз! Оз кӧ ӧд ло скӧт лечитаніныд, «Микӧла милӧсьтливӧйыд» этша нин бурдӧдас скӧттӧ.

Паныдасьысь.