ДЗОЛЯ ЛЫАТЫЫН

(От вӧлӧсьтын, Емдін уездын)

Том йӧз велӧдчӧны.

Дзоля Лыаты — ылын, бокын ичӧтик сикт. Том йӧз сэні тавоӧдз сӧмын юлісны да кулиганитлісны. Таво мырддисны поп керка да восьтісны школа. Сэні эм библиотека. Школаын уджалысь Турбылев ёрт ӧні том йӧзӧс велӧдӧ бур вылӧ, надзӧникӧн найӧ вежсьӧны бурлань. Неважӧн восьтісны РЛКСМ ячейка. Вежӧраджык том йӧз быд рыт локтӧны велӧдысь дінӧ, лыддьӧны нигаяс да газетъяс. Сӧмын газетыс локтӧ миянӧ этша да шоча.

Февраль 28 лунӧ том йӧз сувтӧдісны спектак, ворсісны бура лӧсьыда.

Карса морт кӧ локтас миян спектак вылӧ, дерт сӧмын дивӧ кутас сійӧс: сцена лӧсьӧдтӧм, нинӧм абу, ворсны лоӧ джоджас; сэн жӧ 3−4 рад скамьяяс вылын пукалӧны видзӧдысьяс.

Тадзи Лыатыса том йӧз заводитісны югдӧдчыны, лунысь лунӧ мунӧны водзӧ, лунысь лунӧ дугдӧны юӧмысь. Вежӧраджык йӧз асьныс лёкӧс оз вӧчны дай мукӧдӧс оз лэдзны. Неважӧн ӧти зон гусялӧма вӧлі суседыслысь пуд сю. Кор тӧдлісны другъясыс, тшӧктісны бӧр сетны. Тӧдӧмысь сійӧ сэсся мӧдысь сэтшӧм мыжсӧ оз нин вӧч.

Нуӧдӧй, Лыатыса том йӧз, заводитӧм югдӧдчан-велӧдчан удж водзӧ!

Видзӧдысь.