СӦВЕТЪЯСЛЫ АСЛАНЫС УДЖ ЙЫЛЫСЬ КОЛӦ ВИСЬТАВЛЫНЫ ЙӦЗ ВОДЗЫН

Ӧні Коммунист партиялӧн дай Сӧвет власьтлӧн ёна ыджыд удж сӧветъясын удж бурмӧдӧм, ловзьӧдӧм (оживление) вӧсна, сӧветъяс уджӧ унджык уджалысь йӧзӧс кыскӧм вӧсна. Тайӧ уджсӧ ӧні чорыда, паськыда нуӧдӧны олӧмӧ. Дерт, сӧветъясса удж ловзьӧдӧм нуӧдан удж регыдӧн оз эшты, лоӧ нуӧдны сійӧс воясӧн, лоӧ корсявны, индавны туйяс.

Став Сӧвет Республикаяс Союзса Центральнӧй Исполнительнӧй Комитетбердса сӧвещанньӧ сӧветъясын удж сувтӧдӧм йылысь чуйдӧдаліс дай чуйдӧдалӧ, кыдзи бурджыка тайӧ уджсӧ нуӧдны. Ми ӧткымынлаті гижлім нин сӧвещанньӧ шуӧмъяс йывсьыс. Гижлім, кыдзи сувтӧдны сӧветъясын удж, кыдзи веськӧдны да паськӧдны сійӧ уджсӧ. Сельсӧветъяслы, Волисполкомъяслы колӧ чорыда босьтчыны тайӧ удж бердӧ.

Миян сельсӧветъяслӧн, волисполкомъяслӧн унджыкыслӧн омӧля на мунӧ уджыс ӧти боксянь, асланыс удж йылысь йӧз водзын висьтавлӧм боксянь (отчитываемость). Ӧткымын сельсӧветъясын уджалысьяс татшӧм уджсӧ оз и лыддьыны колан уджӧн, оз пуктыны пыдди. Волисполкомъяс кадъясӧн чукӧртлывлӧны Волсӧветӧс. Сэні сёрнитасны удж йылысь, шуасны, кутшӧм удж код ногӧн нуӧдны. Ачыс Волисполкомыс дай Волсӧветса шленъясыс йӧз водзын (собранньӧяс вылын) асланыс удж йылысь оз жӧ нинӧм висьтавлыны, либӧ висьтавлӧны шоча нин зэв.

Сӧветъяслӧн асланыс удж йылысь йӧз водзын висьтавлӧм зэв колантор. Тайӧ уджсӧ паськыда нуӧдӧмӧн бурджыка, регыдджык унджык йӧз кутасны интересуйтчыны сӧветъяс уджӧн, асьныс сійӧ уджас зільджыка босьтчасны. Тайӧ уджыс да гӧль да шӧркодя олысь крестьянаяслысь тшӧктӧмъяссӧ да корӧмъяссӧ сӧветъясӧн аслас удж йылысь висьтавлӧм бӧрын ёнджыка нуӧдӧм колӧ лоны медтӧдчана, медыджыд удж сӧветъяслӧн ас ставпӧлӧс удж пиас.