КОЛӦ МЫЙКӦ ВӦЧНЫ

(Виз вӧлӧсьт, Емдін уездын)

Миян Кыркӧтш сиктын 1923 воын заводитлісны стрӧитны поп керка. Лэптісны юрӧдзыс дай сэсся водзӧ нуӧдӧмысь дугдісны. Ӧні кольӧм вося тулыссянь сулалӧ сідзи, кӧтасьӧ зэр улын, сісьмӧ.

Унаысь нин комсомолечьяс корлісны собранньӧяс вылын сетны сійӧ керкасӧ кооперативӧ да лыддьысян керка вылӧ, сӧмын пемыд йӧзыд миян некыдзи оз сетчыны. Век на найӧ поп вылӧ пӧ видзӧдӧны, оз гӧгӧрвоны, мый сыысь бурыс. Шуӧны, мый вылӧ пӧ стрӧитӧма, сы вылӧ и олас; оз кӧ сы вылӧ ло, мукӧдлаӧ пӧ ог жӧ сетӧй; мед пӧ сідзи сісьмас, либӧ пӧ керъяссӧ бӧр кыскалам гортаным.

Сідзи миян пемыд йӧз видзӧдӧны, а буртор вылӧ скупӧсь. Кооперативлӧн керкасӧ лоӧ медавны, сы понда донаджык и тӧвар. Сетісны кӧ эськӧ сэтчӧ поп керкасӧ, лэччис тӧварлӧн дон дай лои эськӧ югдӧдчанін — лыддьысян керка. Ӧні йӧзлы югдӧдчыны некӧн. Комсомол ячейкалӧн эм эськӧ школаын уголок, да сэтчӧ некод оз лок — школаыс ылын, бокын.

Вежӧраджык йӧзлӧн колӧ эськӧ ёнджыка босьтчывны да сісьман улысь сетны поп керкасӧ кооперативӧ. Кад нин гӧгӧрвоны, мый бурыс попӧс радейтӧмысь.

Селькор № 210.