КОМИ АНЬЯС, КЫВЗӦЙ!
Кымынӧнӧсь нӧ ті? Ок, унаӧнӧсь ӧд! Сӧмын ёна на ті пемыдӧсь, вывті на пемыдӧсь. Пемыдлунныд тіянӧс сёйӧ, нинӧмӧ воштӧ, косьтӧ, пӧдтӧ, виӧ.
Видзӧдлӧй талунъя газетысь акушерка Сватова йылысь суд. Мый сійӧ висьталӧ? Бара жӧ тіянлысь пемыдлуннытӧ. Не куш ті пемыдӧсь, миян Коми муад унджык йӧзыс на пемыдӧсь.
Паджгаын вӧлі олӧ дӧва баба, мужикыс усьлӧма фронт вылын, Гӧрд армияын. Дерт, дӧва кӧ (либӧ ныв кӧ) нӧбасьны кутас — миян пемыд йӧзыд сійӧс дивитӧны, дай аслыс сылы яндзим. Мый керны? Кыдзкӧ-мыйкӧ ӧдйӧджык тӧждысьӧ мездысьны кагасьыс, зільӧ — кыдз шуӧны миян — рушкусӧ перйыны (велӧдчӧм ногӧн шусьӧ аборт).
Сідз жӧ вӧчӧма и Паджгаса дӧваыд.
Сідз вӧчӧны кымынӧн Коми муад!
Быд ногыс ноксясны войдӧр. Сэсся кутшӧмкӧ «бабка» ордӧ мунасны да и перйӧдасны кагасӧ.
Няйт «струментъяснад» вӧдитчигӧн, няйт кияснад гудрасигӧн да няйтінын аборттӧ вӧчигӧн кымын ань воштӧ ассьыс дзоньвидзалунсӧ! Кымын сы помысь кулысьыс; кымын сирӧта кольлывлӧ сы вӧсна! Кор нин дзик пикӧ воас аньыд да некытчӧ воштысьныс лоӧ — локтӧ (вайӧны) сэки больничаӧ. Унджыкыс нин сэки больничаад воӧны сӧмын кувны — зэв нин шочӧс вермасны сэки спаситны, — да ӧд больничаад зэв этша воӧ, оз ставыс, унджыкыс кольӧ деревняясын.
Сӧветса закон серти, аборт вӧчны вермӧ сӧмын врач (доктор), сӧмын больничаын — сӧстӧминын. Та ногӧн кындзи сэсся некыдзи оз позь, быдӧнӧс сэки мыждасны.
Сэсся аборт вӧчны лэдзсьӧ зэв шоча. Кор мамыс висьӧ либӧ омӧлик да челядясигас сійӧ вермас дзикӧдз ассьыс дзоньвидзалунсӧ воштыны да кувны.
Дзоньвидза аньяслы (дӧва кӧть, ныв кӧть, баба кӧть) кага вайӧмысь оз ков повны ни, яндысьны ни. Ставыс тайӧ миян пемыдлуннымла.
Ӧні миян Сӧвет власьт став нывбабасӧ ӧткодя лыддьӧ. Ныв кӧ либӧ дӧва кага ваясны да быдтыныс оз тырмы налӧн вынныс, перйӧны батьсяньыс сьӧм сы вылӧ. Чурка ним ӧні абу жӧ.
Яндысьны колӧ сэтшӧм аньлы, коді дзоньвидза да аборт вӧчӧдӧ, виӧ ассьыс кагасӧ, бырӧдӧ (йывмӧдӧ) морт рӧд.
Водзмӧстчысь коми аньяс! Висьтавлӧй пемыд чойясныдлы та йылысь, югдӧдӧй найӧс, велӧдӧй, медым видзасны найӧ меддонаторсӧ му вылас — здоровйӧсӧ!
Пальӧдчӧй, коми аньяс!
