ВОЧЫН

(Кулӧмдін уездын)

Исполком.

Исполком уджалӧ шӧркоддьӧма. Юралысьыс эськӧ партийнӧй да, уджсӧ омӧля нуӧдӧ, оз куж уджавнысӧ. Февраль тӧлысьын воліс уезд исполкомысь шлен ревизируйтны исполкомсӧ, да юралысьыс абу судзсьӧма 137 шайт. Сы бӧрти кассасӧ сетісны шленыслы. Ӧні коли нин тӧлысь, а видзӧм сьӧм йывсьыд некод оз и казьтыштлы.

Кооператив эськӧ Вочын важӧн^оригиналын "вежон", 78-ӧд номерын петӧма веськӧдӧм/^ нин эм да, сӧмын оз вермы кок йылас сувтнысӧ. Кодӧс оз бӧрйыны сэтчӧ, сійӧ и оз судзсьы. Январса учёт дырйи тшӧтӧводыс абу судзсьӧма 125 шайт. Ӧні бӧрйисны выль юралысьӧс да, нинӧм жӧ оз уджав, век гортас олӧ.

Пельшӧрскӧй пункт

таво воссис январ тӧлысьын. Пельшӧр бур, йӧзыс волывлӧны зэв ёна. Лекарствоыс важыс вӧлі ичӧтика, да ӧні воис 11 пуд.

Ӧні пельшӧрыс кӧсйӧ кытшовтны вӧлӧсьтса сиктъяссӧ. Пельшӧрскӧй пункт восьтӧмысь йӧз зэв ошкӧны сӧвет власьтӧс.

Лыддьысян керка

воссис 1919 воӧ, сӧмын йӧзыс прамӧя сійӧс эз тӧдлыны. 1924 воын, ноябр тӧлысьын, поп керкаӧ бара воссис лыддьысян керка, сы бердӧ тшӧтш библиотека да клуб. Библиотекаын эм сизимсё кымын нига, джынйыс ӧнія ыстӧм. Гырысь йӧз нигаяссӧ омӧля босьталӧны лыддьыны.

Лыддьысян керка зэв гажа, стенас ӧшӧдлӧма плакатъяс, лозунгъяс, портретъяс.

Епо босьтіс шефство лыддьысян керка вылын да ёна нин отсаліс сылы: вӧчис пызанъяс, сетіс занавес сцена вылӧ, судзӧдӧ газетъяс да журналъяс во джын кежлӧ 22 шайт дон.

Уджсӧ лыддьысян керкаын нуӧдӧны сӧмын учительяс да заведующӧйыс. Партия ячейкалы ни, исполкомлы ни некутшӧм мог быттьӧ сэтчӧдз абу.