ВАЖ САР ДВОРЕЧЬЯС — КРЕСТЬЯНАЛЫ БУРДӦДЧАНІНЪЯС

Крымын, Чёрнӧй море бердын, бӧръя Романов саръяс стрӧитлісны бура ыджыд да мича кар (городок) — Ливадияӧн шусьӧ. Сэні эм кык сарскӧй двореч (ыджыд да ичӧт), сэсся бура уна на посньыдджык керкаяс. Гырысь дворечьясас овлісны сарскӧй семья пытшкысь йӧз, посньыдджыкъясас — налӧн слуга-казакъясыс да Ливадиясӧ видзысьяс.

Таысь кындзи Ливадиялӧн эм бура уна му: садъяс улын да виноградъяс улын.

Ливадияса дворечьяс зэв гажаӧсь. Ыджыд дворечсӧ (видзӧд картинасӧ) пытшсяньыс вӧчӧдӧма зэв дона пӧлӧс пуясӧн, мичмӧдӧма зэв мича резьбаясӧн. Быд вежӧс (комната) лӧсьӧдӧма аслыспӧлӧс ногӧн (стиль). Торъя нин гажаӧсь вежӧсъяс, кӧнъясын овлісны асьныс (сарскӧй семья пытшсаясыс).

Ливадияын климатыс зэв здоров, зэв бур бурдӧдчанін вылӧ (санатория).

Ӧні Сӧвет власьт шуис сетны Ливадиясӧ дзик крестьяналы бурдӧдчанін вылӧ. Тадзи ми аддзам: кӧні войдӧр гажӧдчылісны саръяс асланыс слугаясыскӧд, ӧні сэні кутасны бурдӧдчыны уджалысь крестьяна.

Ливадияӧ мӧдӧдны крестьянаӧс кутасны бӧрйыны вӧлӧсьтъясын торъя комиссияяс. Комиссияас пырӧны куим представитель: волисполкомсянь, коммунист ячейкасянь да мӧда-мӧдлы отсасян комитетсянь.

Крестьянаӧс Ливадияӧ нуасны и сэтісянь бӧр гортас ваясны некутшӧм дон босьттӧг (бесплатно). Местаяс сэні бурдӧдчыны кутасны сетсьыны сӧмын гӧр помын уджалысь крестьяналы.