НЯНЬ ДОНСЯЛӦ — ТӦВАР ДОНТӦММӦ

Видзӧд нянь дон содӧм йылысь № 69 «Югыд туй».

Нянь дон йылысь крестьянинлӧн медыджыд дум.

Нянь донтӧ миян лӧсьӧдлӧ сӧветса государство: сійӧ миян медводдза (главнӧй) нянь ньӧбысьыс крестьяналысь, сійӧ и медглавнӧй нянь вузалысьыс ас муын дай заграничаын.

Та вӧсна Сӧвет власьтлы лоӧ нянь донтӧ сэтшӧмӧс пуктавны, медым эськӧ крестьяналы выгӧднӧ вӧлі, дай нянь ньӧбысьыслы (кодлы вузалӧ Сӧвет власьт ас муын) эз вӧв вывті сьӧкыд.

Сӧветса государство миян воысь воӧ кыптӧ, ёнмӧ, овмӧсыс содӧ. Сы вӧсна и крестьяналы вермӧ сетны (уна нин и сетіс) кокньӧд, сы вӧсна и нянь донтӧ вермис лэптыны. Босьтам кӧ воддза вося нянь донтӧ да ӧніясятӧ — индытӧг нин аддзам, мыйта содіс доныд.

Мӧдарӧ кӧ шуны, тӧварыд зэв нин ёна донтӧммис воддза серти.

Позьӧ артыштны, ёна-ӧ вежсис донъясыс няньлӧн да тӧварлӧн весиг ӧти воӧн. Колян воӧ апрельын пуд сю вылӧ вӧлі муртса шедӧ аршынӧн-джынйӧн (1½ арш.) ситеч; августын нин вӧлі шедӧ пӧшти кык аршын да джын (2½ арш.); таво январын — куим аршын да джын (3½ арш.); ӧні нин шедӧ пуд сю вылад ситечыд вит аршын да джын.

Та серти позьӧ шуны: регыд нин воас сэтшӧм кад, кор крестьяниныд вермыны кутас пуд сю вылад ньӧбны сы мында тӧвар, мыйта ньӧбліс войдӧр, войнаӧдз. Оз нин зэв уна сэтчӧдз и ков.

Ми аддзам: Сӧвет власьт пыр ӧтарӧ тӧждысьӧ чинтыны тӧвар дон. Сідзжӧ и крестьяналы колӧ няньсӧ вузавны толькӧ государстволы да кооперативлы, бокӧ не нуны. Сыысь сӧмын крестьяналы аслыныс пӧльзаыс.