ЛӦСЬӦДЧӦЙ ЫДЖЫД УДЖ ВЫЛӦ!

Велӧдчӧм йӧз висьталӧм серти, таво водз воас тулыс. Шӧрса Россияын кӧнсюрӧ ӧні тулыс нин.

Миянлы колӧ водзвыв лӧсьӧдчыны зэв ыджыд государственнӧй удж вылӧ — сортовка кылӧдны.

Медвойдӧр колӧ, медым ӧти пӧрӧдӧм пу эз коль вӧрӧ, медым ставсӧ вӧлі кыскӧма катище вылӧ.

Мӧд-кӧ, колӧ кадӧ пуръявны став вӧрсӧ да кадӧ петкӧдны посньыд юясысь (медым эз косьмыны).

Сэсся кадӧ кылӧдны.

Медым став уджыс тайӧ муніс ньӧти сувтлытӧг, падмытӧг.

Тайӧ уджыс — зэв ыджыд государственнӧй удж.

Россия вӧрӧн озыр, сы помысь сійӧ зэв ыджыд пӧльза босьтӧ. Мукӧд государствоясын вӧрыс этша, оз тырмы, корӧны миянсянь вузавны. Кымын уна ми вермам вузавны, сымын унджык и пӧльза лоас — быдӧнлы пӧльза: ӧти-кӧ, вӧр лэдзысьяслы гортса нажӧтка; мӧд-кӧ, государство миян ёнмӧ-кыптӧ (бара жӧ крестьяналы сыысь кокньӧдыс воас); сэсся миян асланым Коми обласьтлы доход лоас (попенная плата) — содас местнӧй бюджет, ӧдйӧджык бурмас овмӧс Коми мулӧн — зэв ыджыд пӧльза гӧгӧр.

Коми крестьяналы некутшӧм ногӧн оз ков дзугны-падмӧдны тайӧ уджсӧ. Гашкӧ, шуам, кӧнсюрӧ вӧвлі лёка уджалӧмъяс, либӧ приказчикъяс «Северолеслӧн» топӧдлісны — сійӧс оз ков пыдди пуктыны. «Северолесыдлӧн» ӧд оз на жӧ быдлаӧ судзсьы прамӧй йӧзыс (уналаті на ӧд оз зэв шыльыда миян мун). Сӧмын колӧ тӧдны: «Северолесыд» оз аслыс вӧрсӧ лэдз. «Северолесыд» — государстволӧн организация (трест), став вӧрсӧ лӧсьӧдӧ государстволы — асланым Сӧвет власьтлы. Кутшӧмкӧ приказчик кӧ неладнӧ уджалӧ — сыысь абу «Северолес» мыжаыс, сыысь омӧль приказчикыс и мыжа. Крестьянаӧс ӧтдортӧмысь некодӧс Сӧвет власьт оз ошкы. Крестьяналы уджысь мынтысьтӧмысь оз ков повны: мый дон уджалӧма, сійӧ и сетасны.