КНИГА ДЕРЕВНЯЛЫ

«Картупель вӧдитӧм муяс вылын». В. Г. Котельников. «Новая Деревня» журнал лэдзӧма. Мӧскуа. 1925 во. 60 лист бок.

Доныс 15 ур.

Котельников аслас книгаын гижӧма: крестьяна пӧ картупель вӧдитӧмӧн оз босьтны став пӧльзасӧ, мыйта эськӧ позьӧ вӧлі. Оз босьтны картупельсӧ вӧдитны кужтӧмла. Ещӧ нин этша воӧ пӧльзаыс картупель вӧдитӧмысь сэтшӧминъясын, кӧні сійӧс кӧдзӧны этшаник.

Миян крестьяна унджыкӧс картупель заводитісны вӧдитны эз на зэв важӧн, 60−80 во саясын кымын. Ӧні сійӧс быдлаын нин кӧдзӧны. Ӧдйӧ паськалӧмыс картупельлӧн петкӧдлӧ, кутшӧм сійӧ колантор.

Книгаын индӧма примеръясӧн кӧзяйствояс, кӧнъясын бура вӧдитӧны картупельтӧ да уна воӧ сійӧ.

Висьталӧма, кутшӧм сикасъяс (сортъяс) картупельяс эмӧсь; кыдзи сы улӧ лӧсьӧдны колӧ му; кыдзи пуктыны картупельсӧ; кыдзи дӧзьӧритны картупельсӧ быдмигас.

Сэсся гижӧма картупель керан сям йылысь, кыдзи сійӧс колӧ видзны, кутшӧм висьӧмъяс сылӧн овлӧны да код ногӧн кутны висьмӧмысь.

Позьӧ судзӧдны тайӧ книгасӧ со кутшӧм адрес серти: Москва, угол Тверской и Моховой, 1-й Дом Советов, Книжный магазин «Новая Деревня». Крестьянаяслы ӧтувтчӧмӧн книгаяссӧ корӧмӧн донысь чинтыссьӧ 30 прӧчент вылӧ.