МИ КЫЛАМ

Локтӧны гижӧдъяс, самӧкур пуӧмысь пӧ мукӧдлаын оз на бура кутавны. «Ветлысь-мунысь» гижӧ:

Абъячой вӧлӧсьтын пӧшти быд стая улысь петӧ тшын... Тыдалӧ, милицияыс омӧля видзӧдлывлӧ. Колӧ частӧджык ветлӧдлыны сиктъясӧд.

Паньӧ Миш пи гижӧ сідзи:

Волся вӧлӧсьтын видзӧ пырӧм чӧж юисны самӧкур, сэсся бӧрас вежон кымын пӧкмелитчисны. Мукӧдыс висьмӧмаӧсь да даръясьтӧдз воӧмаӧсь.

Сэсся сійӧ жӧ водзӧ гижӧ:

Том йӧз пӧ юыштасны да, пыр и пуртъясӧдз воасны, зоръясӧн кутасны шардлыны, мӧда-мӧдсӧ вины корсьӧны. Унаӧн мӧда-мӧдсӧ сутшкалӧмаӧсь пуртӧн да кучкалӧмаӧсь зоръясӧн. Уна жугӧдлӧмаӧсь ӧшиньяс да гудӧкъяс.

Зеленечысь «Биа ньӧв» сідзжӧ гижӧ:

Частӧ код йӧзыд ветлӧны туй кузя, увгӧны да матькӧны, корсюрӧ и косясьӧны. Вот кӧ корасны, сэтшӧм йӧзыс жӧ и шуӧны — ми пӧ гӧльӧсь, ог вермӧй мынтыны, нянь пӧ сёйны абу. Самӧкуртӧ пуигӧн да юигӧн, дерт, няньыд бырӧ, оз сійӧ сод.

Самӧкуртӧ пуӧмысь колӧ дугдыны, сійӧ сӧмын лёк вайӧ. Милициялы да исполкомлы колӧ ёнджыка видзӧдны да кутчысьны самӧкуръяс дінӧ. Комсомолечьяслы да войтырӧс велӧдысьяслы колӧ ёнджыка уджавны йӧзӧс югдӧдӧм вылын.

К.