ПОЖӦГСА МИЛИЦИОНЕР САМӦКУР КУТАЛӦМ ПЫДДИ АЧЫС ЮӦ

(Кулӧмдін уездын)

ПОЛЛЬӦ СИКТЫН видзӧ пыран пекничаӧ — ыджыд праздник. Пуисны уна самӧкур. Пожӧгсянь локтіс самӧкур кутавны милиционер Третьяков. Сьӧрсьыс новлӧдлӧ сійӧ «телӧхранитель» пыдди Пожӧгдінысь Демит Емельӧс. Милиционер керкаысь керкаӧ ветлӧдлӧ да «куталӧ» самӧкур чашкаяс, а Демит Емель кутӧ милиционерсӧ пӧрӧмысь да новлӧдлӧ сылысь винтовкасӧ.

Сідзи пекничасянь заводитісны да куим лунӧн ёна и «кутасисны». Вӧскресенньӧӧ воасны Макар сикт помӧ Онопрей Ӧльӧксан ордӧ. Сэні вӧлӧм пукалӧ код юра морт Вомынбӧжысь Опонь Ёгор. Сійӧ босьтас видлыны ружйӧтӧ Емель ордсьыд да видлалігмозыд, прӧступкаӧн ли, кыдзи ли, керка йиркас и гымӧбтас, лыяс. Сэки милиционерыд неуна палялӧма.

Со кутшӧм «гажа» вӧлӧма видзӧ пырӧмыд. Сӧмын буракӧ милиционерыд оз на куж кыдзи колӧ прамӧй ногӧн кутавны самӧкуртӧ.

Колӧ эськӧ велӧдыштны да бурджыка.

Кывзысьысь.