«ДАС КУИМ МӦСКӦН РАЙӦ ЛЭПТӦНЫ КУЛӦМ ЙӦЗӦС»

Тайӧ лунъясӧ Сыктывдінкарӧ воліс ӧти делӧ кузя норасьӧмӧн Чӧддінса (Лӧкчим вожын, Кулӧмдін уездын) крестьянин Ситкарев. Ме сылысь юалі: мися, мыйла нӧ ачыд сё верст сайсянь локтан, эн ысты поштаӧн. Кысь пӧ миянлы сьӧмыс поштанас ыстыны, — кыв видзис Ситкарев ёрт. Сійӧ жӧ меным петкӧдліс ӧти удостоверенньӧ, Лӧкчимса вичкосянь сетлӧмаӧсь 1903 воын юль 25-ӧд лунын. Удостоверенньӧсӧ сетӧмаӧсь Ситкаревлы дон босьтӧм йылысь воксӧ Кристопорсӧ гӧтырыскӧд дзеблӧм йылысь. Тыдалӧ, сетӧмаӧсь, медым Ситкаревлысь оз кутны корны мӧд пӧв вокыслысь овмӧссӧ. Удостоверенньӧ серти, Ситкаревлысь вок гозъясӧ дзебӧмысь босьтӧмаӧсь поп-дяк со мыйта:

1) Сорокаустысь поп-дяклы (сьӧмӧн) — 35 шайт.

2) сыысь жӧ вичколы „ „ 35 „

3) нэм казьтылӧм вылӧ „ „ 25 „

4) молитваысь да дзебӧмысь „ „ 5 ш. 30 ур.

5) Рӧд казьтылӧмысь вичколы (мӧс) сьӧмӧн кӧ 13 ш.

6) Стӧрӧжъяслы 3 пуд сю, сьӧмӧн кӧ 2 ш. 25 ур.

7) Ведра джынъя самӧвар Чӧддінса часовняӧ — 5 ш.

8) Азям, камзол да чувки сэтчӧ жӧ — 3 ш. 60 ур.

9) 13 пуд сю сэтчӧ жӧ 10 ш. 40 ур.

_____

Ставыс сьӧмӧн да кӧлуйӧн 134 ш. 55 ур.

Мӧс кӧ тайӧ сьӧм вылас ньӧбны, шеді эськӧ дас куим душ. Со ӧд попъясыд кутшӧм донӧн абутӧм раяд пемыд йӧзыдлысь рӧдвужтӧ лэптӧны. Ситкарев — гӧль крестьянин. Кутшӧм отсӧг эськӧ вӧлі тайӧ биӧ шыбитӧм сьӧмыс сылы овмӧссӧ кыпӧдыштны.

Коми морт.