ВИЗИН ВӦЛӦСЬТЫН

(Сыктыв уездын)

Крестьяна унаӧн зіля босьтчӧны видз‐му уджалӧм бурмӧдны. Сы вӧсна овмӧсныс крестьянаяслӧн вочасӧн кыптӧ, паськалӧ. Колян восянь ӧнӧдз организуйтӧма 9 сельскокӧзяйственнӧй кооперативнӧй да машиннӧй тӧвариществояс. Шленыс сэні ставыс 209 морт. Тайӧ бӧръя кӧкъямыс тӧлысьнас кредитнӧй тӧварищество судзӧдіс да сеталіс крестьяналы 220 плуг, 1 вартан машина, 1 идзас шыран машина, кык сепаратор (йӧлысь вый вӧчан машина) да мукӧд сикас видз-му уджалан кӧлуй.

Потребительскӧй обществоын шленын джынйыс став вӧлӧсьтса йӧзыс — 499 морт. Обществолӧн лунысь-лун оборотыс содӧ. Колян во мартын став оборотыс вӧлі 1.731 ш. 98 ур, таво февральын вӧлі нин 8.4З1 ш. 72 ур.

Вӧлӧсьтын вӧчӧны общественнӧй керкаяс. Колян во декабрсянь заводитісны ваявны кер ветеринарнӧй (скӧт лечитан) керка вылӧ. Йӧзыс тайӧ керка вылӧ дон босьттӧг вайисны керсӧ 60% став керка вылас колан керъясыслысь (600 кер). Тулыснас керкасӧ заводитасны нин лэптыны.

Тебеньковса сиктын ваялӧны керъяс кык судта керка лэптӧм вылӧ. Улыс судтаас кӧсйӧны лӧсьӧдны пӧжарнӧй сарай да лыддьысян керка, вылысас — школа. Сійӧ сиктын жӧ сельскокӧзяйственнӧй тӧварищество вӧчӧ дьӧгӧдь пуан завод.

Сёрд сиктын лэптӧны пӧжарнӧй сарай.

Чукаыбын важ поп керкаӧ лӧсьӧдӧны школа. Та вылӧ УОНО сетіс 500 шайт сьӧмӧн.

Сельхозналог вӧлӧсьтысь ставсӧ колӧ вӧлі босьтны льготаясӧн сеталӧм бӧрти 6.190 ш. 71 ур. Март 10-ӧд лун кежлӧ мынтісны 92% став налогыслысь. Медбӧръя срокӧдзыс, ме чайта, мынтасны ставсӧ. Йӧзыс налог мынтӧны бура.

Газетӧ гижысь Карманов.