АНЫБЫН

(Кулӧмдін уездын)

Сӧвет власьт вылӧ да ас вӧлӧсьтын служитысьяс вылӧ крестьяна видзӧдӧны бура. Сӧмын налы оз кажитчы самӧкурысь куталӧм (!). Шуасьӧны: асланым няньысь пӧ пуам да, мыйла кутнысӧ. Колӧ ёнджыка висьтавлыны, мый вӧсна оз позь пуны самӧкур, да чорыдджыка милиционерлы босьтчывны самӧкур пуысьясыскӧд вермасьны.

Сельхозналог ӧнӧдз пыр на мынтісны срокъяс кежлӧ.

Челядьӧс велӧдысьяс (учительяс) ёна зільӧны Сӧвет власьтӧс ёнмӧдны. Оз повны сьӧкыд уджысь, уджалӧны сьӧлӧмсяньыс. Луннас велӧдӧны посни челядьӧс, рытнас — гырысьясӧс.

Комсомол ячейкаын 12 шлен, сӧмын уджавнысӧ бура индалысьыс прамӧя абу. Вӧлі эськӧ Лобанов ёрт, да мунас всеобуч вылӧ, сэсся кольӧны ставыс ӧткодь омӧля велӧдчӧм йӧз. Ӧнӧдз Аныбсалы эз на сетлыны совпартшколаын велӧдчыны весиг ӧти места. Колӧ жӧ эськӧ сетны да, мед кӧть том йӧз пӧвстас уджалысьыс лои.

Епо лавкаын эм эськӧ 110 гӧгӧр шлен, да уджыс мунӧ омӧля. Тӧваръяс зэв этша, босьтчыны оз вермы. Колян воӧ зэв уна эз судзсьы приказчикыс, сэсянь сэсся лавкаыд пыр на зэв гӧля кыссьӧ, оз вермы кок йылас сувтны.

Панюков.