БЫДСИКАС ОБЩЕСТВОСА ЯЧЕЙКАЯСЫН УДЖ ЙЫЛЫСЬ

Миян обласьтын каръясын, пӧшти быд вӧлӧсьтын став Сӧвет Республикаяс Союзын моз эмӧсь уна сикас организациялӧн ячейкаяс: ОДВФ, Доброхим, МОПР, йӧзӧс югдӧдан Обществояслӧн чукӧръяс (Об-во Долой Неграмотность). Дерт, тайӧ ячейкаяссӧ восьталӧмын унджык деревняын водзмӧстчысьясыс вӧвліны коммунист да комсомол ячейкаяс, сэсся профсоюзъяс.

Уджалӧны-ӧ татшӧм ячейкаясыс кыдзи колӧ уджавнысӧ? Дерт, оз. Унджык вӧлӧсьтъясын ячейкаясыс некутшӧм удж оз нуӧдны членскӧй взносъяс босьталӧм кындзи. Уна ячейка восьтӧма со кыдзи. Коммунист ячейка либӧ комсомол да мукӧд организацияяс кывласны: со пӧ сэтшӧм-сэтшӧм общество воссьӧма, позьӧ пӧ дай колӧ деревняын восьтыны сійӧ обществоыслысь ячейка. Либӧ кывлӧм пыдди ас визьӧдыс (линии) коммунист, комсомол ячейкаяслы, мукӧдлы воас тшӧктӧм. Чукӧртчасны собранньӧ вылӧ, сёрнитыштасны, шуасны восьтыны ячейка, гижсясны сэтчӧ йӧзыд, гижӧдасны мукӧддырйиыс весиг коді оз эськӧ кӧсйы вӧлі, чукӧртасны членскӧй взносъяс (быд тӧлысь либӧ ӧтпырйӧ дзонь во кежлӧ взноссӧ босьтӧны) — дай пом. Унджыксьыс зільӧны ячейкасӧ восьтыны регыдджыкӧн, тэрмасигтырйи, унджыкыс зільӧны ячейкаӧ пыртны уна йӧзӧс. Дерт, кымын регыдӧн верман восьтыны, кымын унджык йӧз ячейкаясын, сымын бур. Сӧмын ӧд колӧ видзӧдлыны ячейкаясӧн водзӧ удж нуӧдӧм вылас. Со танісӧ и абу гӧгӧрбок лючки. Шулім нин тай ми тані, мися, уналаын ячейкаас некутшӧм удж оз нуӧдны членскӧй взносъяс босьталӧм кындзи. Тайӧ уджыд ӧд ёна на этша, сӧмын ӧтар бокыс став уджыслӧн. Мӧдар бокыс — ячейкаса шленъяслы асланыс тӧдмасьӧм обществоса удж сямнас, мыйла лӧсьӧдӧма обществосӧ — абу. Сідзи жӧ омӧля мунӧ висьтавлӧмыс сы йылысь йӧзлы. Сы вӧсна ячейкаясӧ йӧз омӧля содӧ. Босьтам ОДВФ ячейкаӧс. Сылӧн ӧд уджыс абу сӧмын членскӧй взносъяс босьталӧмын, сылы та кындзи колӧ тӧдмасьны лэбалан машинаясыскӧд (аэропланъяскӧд), тӧдмасьны, мыйла сійӧ колӧ, с. в. Ячейкаса шленъяслы колӧ помала, дугдывтӧг, быд лун висьтавлыны йӧзлы, мый вӧсна колӧ ОДВФ-ыс, мый вылӧ сійӧ лӧсьӧдӧма. Босьтам йӧзӧс югдӧдан обществолысь ячейкаяс. Членскӧй взносъяс босьталӧм уджыд сэні зэв ичӧт удж. Тайӧ ячейкалӧн медыджыд уджыс: бырӧдны йӧз пӧвстын лыддьысьны-гижны кужтӧмлун, неграмотнӧй йӧзлы висьтавлыны велӧдчӧмыслысь коланлунсӧ, тшӧктыны велӧдчыны, быд ячейкаын сулалысь шленлы аслыс велӧдны кымынкӧ мортӧс грамотаӧ. Татшӧм уджсӧ кӧ кутан кужӧмӧн, помала, тӧдчанаӧн нуӧдны, дерт ячейкаясӧ унджык йӧз пырас, быдӧн бурджыка тӧдасны коланлунсӧ быд обществолысь. Зэв эськӧ бур вӧлі тайӧ уджсӧ нуӧдӧм вылӧ восьтавны лыддьысян керкаясын пельӧсъяс: МОПР-лысь, Доброхимлысь, мукӧд обществояслысь. Та вылӧ ячейкаяслӧн колӧ лоны литература. Сэсся оз ков мырдӧнмоз тшӧктыны пырны йӧзӧс ячейкаясӧ, медым найӧ оз кутны лыддьыссьыны шленъясӧн куш бумага вылын, а сьӧлӧмсяньыс эськӧ уджалісны. Медым ячейкаын йӧзыс этшаджык, да ставныс вӧліны ас вӧлясьыныс пырӧмъяс, бур уджалысьяс. Татшӧм ячейкаыд, дерт, ёнджык, бурджык, вермасджык уджсӧ нуӧдны, тӧдчанаджык уджыс лоӧ. Сы вӧсна ячейкаӧ пыр ӧтарӧ йӧзыс унджык кутасны пырны, пыр ӧтарӧ шленъяс содасны.