ПОШТА КУД

Сандрик Васьлы. Помӧсдін. Некодлы, ёрт, тэнад гижӧдыд абу интереснӧй: некод оз и лыддьы, кӧть и печатайтам. Спектактӧ ӧд ӧні быдлаын унаысь сувтӧдлывлӧны.

Сюзьлы. Дереваннӧйӧ. Кутшӧм нӧ миянлы мог тіян попӧдз. Быд попнас ӧд газеттӧ он тырт. Гиж мукӧдтор йылысь. Комиӧн гижан тэ лӧсьыда.

Крестьянинлы. Летка. Ми огӧ тӧдӧ, мый тэ кӧсйин висьтавны аслад «Колӧ тӧдны» гижӧдын. Омӧльсӧ ни бурсӧ огӧ аддзӧй. Лесник да приказчик... сэсся нӧ мый?

Син янӧдысьлы. Койгорт. Тешкодь жӧ тэ, ёрт. Велӧдысь йывсьыд гижан зэв ичӧтиктор йылысь, сэсся шуан: сійӧ пӧ мунӧ важ, сардырся талялӧм туйӧд. Нокӧ, видзӧдлы бурджыка, сідзи-ӧ? Колӧкӧ мӧдарӧ лоӧ. Шуныд ӧд быдтор позьӧ, колӧ кужны петкӧдлыны, мый вӧсна сідзисӧ шуан, кутшӧм удж вӧсна.

Паньӧ Миш пилы. Волся. Волсяса комсомол ячейка организуйтчӧм йывсьыд нинӧм газетӧ лэдзӧмысь. Гиж мукӧдтор йылысь. «Бабаяслы син пыркысь»-ыд оз жӧ мун. Велӧдӧй найӧс, петкӧдлӧй налы коланлунсӧ лыддьысян керкалысь; сэки дугдасны шуасьӧмъясысь.

Сюзьпилы. Поёл. «Колӧ дугӧдны татшӧм уджъясысь»-ыд оз мун. Дерт, колӧ. Сӧмын газетӧ лэдзӧмысь нинӧм. Босьтчы ачыд сьӧлӧмсяньыдджык дугӧдны.

Домна Васьлы. Кырув. Ӧткымынлаті босьтім ыстӧм гижӧдъяссьыд. Сэсся мукӧдыс оз туйны. «Колльӧдісны праздник» гижӧдад тэ быд кыв костын сюйӧмыд «зэв бура» да «быдторсӧ» вӧчисны да. Тайӧ висьталӧмыд этша на. Колӧ ӧд гижны, мый вӧчисны да, кыдзи да. «Зэв бура» кывъяснад уна он висьтав, нинӧм он петкӧдлы.

Суринлы. Поёл. Нинӧм сы понда. Абу ыджыд мыж. Ӧні ӧд кывзанныд нин.