БЫРӦДАМӦЙ ПЕМЫДЛУНКыа петӧ, бырӧ пемыд, Чеччы, садьмы, коми ань; Кутчысь велӧдчыны регыд, Корсьлы нига «Югыдлань»! Кӧсъян кӧ тэ бура овны — Комын шыпас юрад сюй; Сійӧ уджысь оз ков повны. Сэсся лыддьы «Югыд туй». Сӧмын куим тӧлысь сайын Ме эг кужлы гижсьыны; Ӧні лыддя нига «Райын» — Верман жӧ тай вежсьыны. Менам муса Парпонӧй Ме вылӧ оз видзӧд: Тэ пӧ абу грамотнӧй, Мун ме дінысь водзӧ! Менам вит арӧса вокӧй Лыддьысьны нин кужӧ — Окӧй, окӧй, ок-ок-окӧй, Быттьӧ на ме чужи. Муса чойяс, дона вокъяс, Ме моз энӧ олӧй; Мед кӧть мый шуӧны попъяс — Олӧм асьныд дорӧй! Мича асыв, шонді петіс, Кымӧр оз и мыччысьлы. Сӧвет власьт мем вежӧр сетіс, Велалі ме лыддьысьны. Войдӧр сӧмын вурун летлі, Лыддьысьны эз велӧд сар; Ӧні школаӧ ме ветлі — Ачым лои секретар. Тӧдӧмысь ӧд, некод мортыд Грамотнӧй оз чуж, Нэмыс олас коми ёртыд — Лыддьысьны оз куж. Вайӧ, зонъяс, мича нывъяс, Войтӧ пукны дугдам, Чукӧртчамӧй тайӧ лунъяс, Велӧдчыны кутам. Мыйӧн школа воссис грездын Гырысь велӧдчытӧм йӧзлы, Шуис Семӧ бабалы: «Тырмас тэныд бӧбъявны, Велӧдчыны ӧдйӧ мун — Бырӧд ассьыд пемыдлун!» Талун велӧдчӧмысь дугдім — Кушмис «Шыпас йӧртӧд»; Вӧлись юрӧй менам югдіс, Синмысь уси кӧртӧд. Тӧвся войыд кыссьӧ дыр, Гӧгӧр ставыс узьӧ; Сӧмын ӧтик ӧшинь пыр Билӧн югӧр усьӧ; Пызан вылын ломтысьӧ Зэв ичӧтик дзузган — Кодкӧ кылӧ лыддьысьӧ, Кылӧ перӧ дзурскӧм. Гӧлиник крестьянин нывлӧн, Кӧть и уна роботаыд, Дум вылас важӧн нин сылӧн Велӧдчыны грамотаӧ. Корсис нига «Югыдлань» — Коли ӧтик тӧлысь, Видзӧдлім кӧ — коми ань Петіс пемыд шӧрысь. Войдӧр. Пемдыны на кӧсйӧ, Войпукны ме пета, Коді паныд сюрӧ — Сылы ме и сӧта. Ӧні. Рытыд мыйӧн локтас, Школаӧ ме муна: Нига вежӧр содтас, Пӧльза сетас уна. Й. Ж.
