ВОСЬСА ЕНЭЖ УЛЫН — ГӦРД ПИАНИНО
Сыктывкарлы да Россиялы сиӧм лунъясӧ уна сикас гаж нуӧдісны юркарса Киров нима паркын, тшӧтш и сэтчӧс гӧрд пианино дорын.
Турунвиж кыдзьяс дорын юргис тӧдса и тӧдтӧм мича шылад.
Челядь, томулов и верстьӧ нимкодясисны пианиноӧн ывла вылын ворсӧмӧн, кӧть и йӧзыслы, чайта, тайӧ кутшӧмакӧ шензьӧдана вӧлі. Мыйла? Клавишаа инструменттӧ ӧд сӧмын сцена вылысь аддзылан либӧ музыкальнӧй классын. А тані сійӧ восьса енэж улын нимкодьӧдӧ челядьдырся тӧдса шыладӧн.
Уна йӧз пӧвстӧд матыстчи тайӧ аслыспӧлӧс концерт вылас пианиноӧн ворсысьяс дорӧ да пырӧдчи накӧд сёрниӧ. Кыдз тыдовтчис, том гозъя тайӧ проектсӧ миян карын збыльмӧдӧны 2019 восянь нин. Шылад улын найӧ и висьтасисны меным.
Миян карын татшӧм аслыспӧлӧс уджтассӧ збыльмӧдӧм йылысь мӧвпыс воӧма налы юрас Санкт-Петербургын 2018 воын, кор кывлӧмаӧсь пианиноӧн ворсӧмсӧ веськыда Нева берег вылын Фаберже музей дорын. Асьныс тшӧтш ворсӧмаӧсь тайӧ инструментнас да, питерсаыд весиг клопайтӧмаӧсь. Сэки и ыззьӧмаӧсь, окота лоӧма и Сыктывкарын збыльмӧдны татшӧм проектсӧ.
И сідз, тӧдмасьӧй — Полина Шабанова да Александр Маслов. Музыкаыд налы, рочӧн кӧ, хобби. Полина велӧдчӧма музыкальнӧй нырвизь серти школаӧ котралігас на, Усогорскын, но сылӧн ӧнія уджыс такӧд абу йитчӧма. Сідзжӧ и Александр.
— «Питерса» уджтаснымӧс олӧмӧ пӧртӧм могысь шыӧдчим сэки Сыктывкарса администрацияӧн веськӧдлысь Валерий Козлов дорӧ. Сійӧ музыкант жӧ да, ӧдйӧ и шуис отсавны, — висьталӧ Александр. — Ӧтув корсим пианинолы местасӧ. Медводз вӧзйисны сувтӧдны паркпӧлӧнса Киров нима улича вылӧ, кӧні пырджык нуӧдӧны быдсяма гажсӧ да ярмарка-фестивальсӧ. Но ми эг сӧгласитчӧй да кутім корсьны лӧсяланаджыкин.
И сӧмын мӧд вонас аддзим, кытчӧ сувтӧдны гӧрд пианиносӧ — Киров нима паркын XІX нэмся беседка дорын. Быттьӧ сэн и вӧлӧма сылӧн местаыс, сэтшӧм бура лӧсялӧ гӧрд рӧмыс паркыслӧн гожся турунвиж рӧмыслы. Да и арнас позьӧ нимкодясьны лӧня шлывгысь Сыктыв юӧн. Ни ӧти морт оз мун татчӧ кежавтӧг.
— «Шольц» пианино быдсикас сцена вылын «уджаліс» 1975 восянь, но пыр на мичаа юргӧ. Миянлы воис мӧвп мавтны сійӧс гӧрдӧн. И, чайта, эг сорсьӧй. Медводдза лунсяньыс казялім, мый татшӧм рӧмыс кыскӧ йӧзсӧ, кодъяс локтӧны паркӧ шойччыны. Тшӧкыда матыстчылӧны да корӧны сыӧн ворсыштны. А ми медводз кутшӧмакӧ полыштім, мед пианиносӧ оз жугӧдны. Весиг дежуритлім сы дорын. Но вочасӧн гӧгӧрвоим, мый некод оз пакӧститчы. Кодкӧ профессиональнӧя ворсӧ, челядь сідз клавишасӧ личкалӧны. Весиг йӧзыс нин видзӧдӧны пианино бӧрся, шуам, зэрысь вевттьӧны. Волӧны татчӧ, кыдзи и талун, и тӧдтӧм музыкантъяс. Ворсӧны оз сӧмын пианиноӧн, но и асланыс мукӧд инструментӧн. Татшӧм здукъясӧ татчӧ сибӧдчӧны-локтӧны паркын шойччысьяс и ветлысь-мунысьяс, кодсюрӧ шылад улас весиг йӧктӧны. Сідзкӧ, Киров нима паркын тайӧ местаыс — шылада ин. И гӧрд пианино нималӧ нин Сыктывкарын.
Шыладсӧ тані позьӧ кывзыны быдӧнлы. Чукӧртчылӧны ворсны котыръясӧн либӧ найӧ, кодъяс оз на нимавны. А гӧрд пианино ышӧдӧ музыкаӧ сӧмын на босьтчысьясӧс водзӧ ворсны.
— Нимкодь, мый миян проектным кажитчис юркарын олысьяслы, тшӧтш и карса администрациялы. Миян корӧм серти татчӧ нюжӧдісны югыд би да пуктісны видеокамера. Ёна отсасьӧ «КС Альфа» да тайӧ компаниясьыс генеральнӧй директор Сергей Кулаков, — тӧдчӧдӧ Александр Маслов.
Паркын тайӧ иныс кыскӧ юркарын олысьясӧс аслас мичлунӧн, пелькиник лабичьясӧн, аслыспӧлӧс беседкаӧн, ю вылӧ шензьӧдана серпасӧн да гӧрд пианиноӧн.
— Гӧрд пианино кутас нимкодьӧдны миянӧс гожӧмбыд. Нёльӧд сезон нин таво ворсам. Аттьӧ нималана и ичӧт на пианистъяслы: Анна Рассохиналы да Лариса Бахтиналы, Луи Армстронглы — сійӧ жӧ опера да балет театрын сьылысь Игорь Земскойлы, а сідзжӧ «Solyth» котырлы, Алиса Морозлӧн (фортепиано) да Игорь Абдулаевлӧн (гитара) дуэтлы. Концерт помасигӧн Сыктывкарысь «Яблочный ДЖЕМ» рок-котыр ыззьӧдіс видзӧдысьясӧс, кыпӧдіс налысь ловсӧ. Но! Та вылын эз на ставыс помась. Верӧсыскӧд сьыліс да ворсіс Евгения Захарко. Фортепиано сайӧ пуксьылӧмӧн нимкодьӧдіс Григорий Кушнеров, а сыкӧд дуэтын Игорь Земской некымынысь петкӧдчис «бис» вылӧ.
Сёрӧн рытнас, кор ывлаас ёна нин ыркаліс, беседкаын лои «жар». Тані сьылісны енбиа томулов да бара жӧ Игорь Земской, — нимкодьпырысь висьталіс меным телепон пыр нин Полина Шабанова.
* * *
Асывнас паркын котралігӧн тшӧкыда аддзыла гӧрд пианиноӧн ворсысь томуловӧс. И сэтшӧм водз, кор, кыдз шуласны, медводдза петукъяс на сӧмын заводитӧны чуксасьны.
Мед и водзӧ асывсянь сёр рытӧдз юргас миян паркын шылад. Аттьӧ таысь водзмӧстчысь йӧзлы!
