ТУЛЫС КЕЖЛӦ КӦЙДЫСЪЯС ЛОКТӦНЫ

Таво кӧйдыс йылысь тӧждысьӧ сӧмын Госсельсклад (му-видз кӧлуйӧн вузасянін) ӧтнас. Кутшӧмсюрӧ кӧйдыс сылӧн эськӧ и важыс эм, да этша. Мукӧд кӧйдысыс дыр нин куйлӧма да чужанлунсӧ воштӧма — сэтшӧм туйтӧм (бракуйтӧм) кӧйдыссӧ сійӧ вузавны оз кут.

Тайӧ лунъясӧ Сыктывдінкарӧ воас сылы выль кӧйдысъяс. Вайӧны уна пӧлӧс кӧйдыс: 1) галан 3 пуд, 2) капуста 1½ п., 3) кушман 1 пуд, 4) сёркни 2 п. 20 пунт., 5) анькытш 5 пуд, 6) ӧгурчи 2 п. 20 ф., 7) морков 2 пуд, 8) бобы 15 пуд, 9) свеклӧ 2 пуд, 10) нёль пӧлӧс турун кӧйдыс 29 пуд, 11) скӧт сёркни (турнепс) 5 пуд, 12) скӧт свеклӧ 2 пуд, 13) скӧт морков 1 пуд. Сэсся Вяткаысь медводдза паракодӧн виччысьӧны 300 пуд анькытш. Паракодӧн жӧ воас 100 пуд вика кӧйдыс да 120 пуд бобӧнянь турун кӧйдыс.

Донсӧ кӧйдыслысь оз на вермыны тшук висьтавны, сӧмын кывсьӧ: таво пӧ доныс чиныштас кольӧм вося серти. Кӧйдыссӧ вузалігӧн лавкаас ӧшӧдасны гижӧд: пасъясны донсӧ и, чужанлунсӧ и, туянлунсӧ и.

Колӧ шуны, вика кӧйдыс кӧ оз вайны дзик первой паракодӧн — сійӧ сёрмас миянын кӧдзны.

Агроном Темноев.