ПОШТА КУД

Домна Васьлы. Кырув. Сутшкалӧм йывсьыд оз мун. «Нывбабалы» стихотворенньӧыд оз жӧ мун. Абу шыльыдлуныс.

Г. С. Чугаевлы. Совпартшкола. «Сёйӧ пемыдлун» статьяыд оз мун. Уна нин ми гижлім та йылысь.

Ёсь перӧлы. Помӧсдін. «Абу мӧрччӧма» — шуан. Зэв тай тэрыба тэ кӧсъян вӧчны, пырысьтӧм-пыр. Вочасӧн лоӧ. Гашкӧ, уна пӧрйӧ на лоӧ гижлыны да мӧрччытӧдзыс.

Ӧльӧк Ӧндрейлы. ОЗУ. «Мый колӧ кооперативъяссянь союзӧ пыригӧн» статьяыд эз шогмы.

Том пионерлы. Кырув. Гижӧдъясыд, ёрт, оз мунны. Ми чайтам, комсомолечьясыд тіянӧс оз ӧтдортны. Эмӧсь кӧ сэтшӧмъясыс, висьтав комсомол ячейкаад, сійӧ дугӧдас. Позьӧ гижны стеннӧй газетад.

Делегатка Колегова Пеклалы. Визин. «Тувсов удж» йывсьыд газетын оз мун. Гиж стеннӧй газетад.

Н. Поповлы. Лун Пока. Ыстӧм гижӧдъясыд оз мунны. Вывті нин поснитор йылысь гижан дай ӧткымын кывйӧн сӧмын. Гиж мукӧдтор йылысь.

Кӧрткерӧс. П. С. Поповлы. «Смелджыка, том войтыр, мунам» стихотворенньӧыд оз мун газетын. Тэ стихотворенньӧад ставас долян ӧти йылысь, сӧмын мӧд пӧлӧс кывъясӧн быттьӧ-а.

Майбурова Марьялы. «Важ школа да выль школа» да мукӧд статьяясыд газетын оз мунны.

Ыб. Комсомолечлы. Тэ, ёрт, абу кырымалӧмыд ассьыд гижӧдтӧ да, кыдзи ми вермам газетын лэдзны. Мыйла нӧ эськӧ эн кырымась?

Аддзылысьлы. Руч. Зэв колан удж ті нуӧданныд. Водзӧ уджалӧй сідзи жӧ. Сӧмын газетӧ лэдзӧмысь нинӧм.

Писателю газеты. Мыйла нӧ эськӧ ассьыд ним-овтӧ эн гиж? Сэки эськӧ и сёрнитны ми тэкӧд кутім. Кодӧс ми огӧ тӧдӧ, сыкӧд огӧ сёрнитӧ. Весиг ми огӧ тӧдӧ, кӧні пӧ и олан тэ.

Шараповлы. Визинса Уком РКП (б). «Со кутшӧм артистъяс» гижӧм вылӧ вочакывйыд оз мун. Эз ков аскӧдныс артистъяслы нуны бокӧвӧй код юра йӧзӧс. Сэсся тэ он став гижӧм вылас вочакывсӧ гиж дай абу вермӧмыд пыдісяньджык петкӧдлыны.

Коневалы. Визин. «Письмӧяс вошласьӧны» йывсьыд газетын оз мун. Быд письмӧ вошӧм йылысь гижны миян газетын местаыс оз тырмы. Колӧ аслыд гижӧмтортӧ лӧсьӧдны зільны.

Иван Кирӧлы. Немдін. «Велӧдчамӧ лучшӧ гортын» да «Пионер чукӧр» статьяясыд оз мунны. Нинӧм выльторсӧ он висьтав. Гиж сиктса олӧм йывсьыд бурджык.

Велӧдысь Гичевлы. Керчомъя. «Коми челядь велӧдысьяслы» статьяыд оз мун. Нинӧм выльторйыс абу.

Зілы. Пожӧг. Спектак сувтӧдӧм йывсьыд оз мун газетын. Гижан — ставыс пӧ збыль, эг пӧ ылӧдлы. Мыйӧн нӧ ылӧдан? Нинӧм абу гижӧмыд да.