АЙКАТЫЛАЫН (ЕМДІН УЕЗДЫН)

Кӧнӧвалъяс «кодзӧны» нывбабаясӧс.

Миян Айкатыласа вӧлӧсьтӧд частӧ ветлӧдлӧны Удораса кӧнӧвалъяс, кодзалӧны чаньясӧс, порсьясӧс, «кодзлывлӧны» и пемыд нывбабаясӧс. Ӧти кӧнӧвал бура ёна «кодзӧма» Сысписа бабаӧс: вирсӧ лэдзӧма да нимвидзӧма. Коркӧ Сысписа тьӧтӧыдлӧн вошлӧма кутшӧмсюрӧ кӧлуй. Кӧнӧвалыд «нимвидзӧма», ва пыр видзӧдлӧма да шуӧма сылы: «Матын тай эськӧ тэнад кӧлуйыд да, озджык на сюрны-а»...

Зэв на пемыда олӧны миян аньяс.

Партия содӧ.

Коммунист партия миян вочасӧн кутіс содны. Февраль тӧлысьын Айкатыласа коммунист ячейкаӧ выльысь босьтісны вит шленӧс: куимыс комсомолечьяс, ӧтик учитель да ӧтик Гӧрд армияысь воӧм морт.

Кооператив ёнмӧ.

Потребительскӧй общество миян пыр ӧтарӧ кутіс кыптыны-ёнмыны. Неважӧн восьтісны Семуков грездӧ отделенньӧ. Шленъясыс вочасӧн содӧны. Крестьяна шуалӧны: «Вӧлі кӧ эськӧ нажӧтка, ставным пырим шленӧ».

Кык тӧлысьӧн кооператив бергӧдӧма тӧварсӧ кык сюрс шайт дон. Айкатыласа йӧзлы сетіс нажӧтка 5553 шайт дон — груз кыскавны Удораӧ. Сэсся сетіс матіса вӧлӧсьтсалы — Отсалы, Гамсалы, Зӧвсьӧртсалы — нажӧтка сы мында гӧгӧр жӧ.

Став шленыс — 297 морт, на пытшкын 40 нывбаба.

Судзӧдӧ йӧзлы «Югыд туй» газет (вит номер), сэсся лыддьысян керкаӧ судзӧдӧ Мӧскуаса газетъяс: «Известия», журнал «Крестьянка», «Коммунистка» да «Лапоть».

Босьтіс аслас кипод улӧ Шежамысь мельнича.

Уджӧн сетӧма крестьяналы тӧварсӧ 300 шайт дон, надейтчӧ кокньыда чукӧртны сійӧс.

Кымын кооператив.

Айкатыласа вӧлӧсьтын дас куим пӧлӧс кооператив, тӧварищество да артельяс. Став шленыс сэні 1285 морт. Медыджыд кооперативыс — удждысян (кредитнӧй) тӧварищество «Удждысь» нима. Сэні 397 шлен. Сы бӧрын потребительскӧй общество — 297 шлен; сэсся электричество лӧсьӧдан тӧварищество — 156 шлен. Став кооператив йывсьыс кӧ гижны, кутшӧма уджыс мунӧ, позьӧ шуны: ӧткымыныс уджалӧны лёка бура, тӧдчӧ нин налӧн бур уджъяссӧ вӧчӧмыс.

Айка.