КОЛӦ ЧОРЫДДЖЫКА СУЛАВНЫ КРЕСТЬЯНА ДОР

Тулыс кутіс воны. Уна крестьяна, нажӧтка вӧсна, медасьӧны «тувсавны» — пуръясьны да пурйӧн кывтны. Дерт, тувсавны мунӧны гӧльджык крестьяна, кодъяслӧн быдлаті оз судзсьы да унатор оз тырмы.

Коми крестьянинлӧн этша пӧлӧс нажӧткаыд: заводӧ ветлӧм, вӧралӧм (кодсюрӧлӧн), сортовка лэдзӧм да пур дорын тувсалӧм — со и ставыс. Став уджыс сьӧкыд, быдлаӧ колӧ вывті уна вын пуктыны.

Сьӧкыд уджысь эськӧ коми крестьяниныд оз бӧрыньтчы да, унджыксьыс оз сетны сылы тыр донсӧ удж сертиыс.

Босьтам колян вося тувсалӧм. «Русголландлес» да «Северолес» вӧлі пукталӧмаӧсь бокӧвӧй пӧдрадчикъясӧс да нарадчикъясӧс пур вылӧ йӧзӧс медавны. Найӧ кыдз-мый вермисны видзӧдісны дядьӧтӧ «кӧмӧдны». Кымынӧн норасьлісны! А кымын шыасьтӧмыс-норасьтӧмыс коли! Мукӧдыслы ӧнӧдз на абу сетӧма сьӧмыс сполна пурйӧн кывтӧмсьыс — дзонь воӧн!..

Мыйла сідзи? Дерт, коми крестьяна пемыдӧсь, унатор оз тӧдны, оз зільны организуйтчыны. Пӧдрадчикъяс наысь сюсьӧсьджык дай наянӧсьджык, найӧ зэв бура кужӧны ас дорныс сулавны — дерт, сэсся найӧ вермасны венны сьӧд мужиктӧ. Вӧчавлӧмаӧсь эськӧ условйӧяс (договоръяс), да унаысь мынтысьӧмаӧсь мӧд ногӧн. Бӧрвылас сэсся дядьӧыдлы нажӧтка пыдди толькӧ «прожӧтка» лоӧ...

Видзӧдлам кӧ пурйӧн кывтысьыдлысь уджсӧ бурджыка — аддзам, мый сійӧ сулалӧ. Пуръясигас йиа ваын келалӧ, здоровйӧсӧ воштӧ. Кывтігас оз узьлы прамӧя, медым эськӧ полойӧ оз сюй, лыа вылӧ оз ляскы. Тӧла дырйи суткиӧн-суткиӧн (мукӧддырйи вежонӧн) сулавны лоӧ ӧти местаын. Либӧ пурйыд сибдас, ваыд усьӧ (ямӧ), верман дзикӧдз косьмыны. Келалӧны сэки артельӧн, мездӧны, плитаӧн-плитаӧн перъялӧны. Кымын лун-вой мужикыдлӧн сэтчӧ кольлывлӧ! А коді сылы «простойсьыс» мынтысьлывліс? Сэні ещӧ гӧран-кӧдзан кадыд талялӧ... Гӧгӧр мат!

Водзӧ кежлӧ кыдзкӧ колӧ бурджыка лӧсьӧдны тайӧ уджсӧ.

Ӧти-кӧ, колӧ пуръясьысьясӧс да пурйӧн кывтысьясӧс организуйтны профсоюзӧ.

Мӧд-кӧ, условйӧсӧ (договорсӧ) вӧчигӧн отдел Трудалы да профсоюзлы колӧ бура гӧгӧрбок видлавны, медым некутшӧм ӧтдортӧм крестьянаӧс эз вӧв. Колӧ ставсӧ сэтчӧ урчитны — простойсӧ и, висьмӧм-доймалӧмсӧ и, — быдтор медым вӧлі тыдалана (ясно) уджалысьлы, медым условйӧсӧ эз позь бергӧдны мӧдарӧ, додь вожӧс моз.

Колян восӧ кӧ кытсюрӧ вӧлі ёна тшупӧдӧсь, медым таво быдлаті вӧлі шыльыд. Медым крестьяналӧн вын песӧмыс эз вош прӧста, эз пӧр весьшӧрӧ «ва песӧмӧ».