И «ЭЗЫСЬ ВОЯСЫД» — ДЗОРИДЗАЛАН КАД

Пенсия вылӧ петӧм бӧрын олӧма мортлы абу на окота олӧмсьыс бӧрӧ кольччыны. Со и Сыктывкарысь «эзысь арлыда» кӧкъямысдас сайӧ ань да мужичӧй шуисны аслыныс: «Пӧрысьмыны колӧ мичаа!» да ветлӧдлӧны бальнӧй йӧктӧмъяслӧн «Секрет молодости» школаӧ.

Нелямын кык во врач, медицина наукаса доктор Светлана Васильевна Бузова уджалӧма Коми пединститутын, сэсся вит во олӧма Москваын, а локтӧма Сыктывкарӧ да веськалӧма бал вылӧ.

Балсӧ восьтіс кыпыд полонез. Европаын XVІІІ-XІX нэмъясӧ сійӧс медся тшӧкыда йӧктылісны. Фрака мужичӧйяс да мича платтьӧа аньяс петкӧдлісны, мый и ыджыд арлыдӧн позьӧ кывны асьтӧ томӧн.

— Татшӧм балсӧ ми котыртлам сизим во дорвыв нин, и зілям кутчысьны традицияясӧ, — висьталіс бальнӧй йӧктӧмъяслӧн школаӧн веськӧдлысь Марина Цибарт. — Бал видзӧдны воысьяс оз на бура тӧдны, кыдзи сійӧс колӧ нуӧдны, и ми котыртлам мастер-классъяс, медым унджыкӧс тӧдмӧдны йӧктӧмъяснас. Кодъяскӧ сэсся и асьныс босьтчӧны йӧктыны.

Гӧсьтъяслы балыс — гаж, ӧд аньяс пасьталӧны медся мича платтьӧяссӧ, кӧсйӧны петкӧдлыны асьсӧ медся бур боксянь, а кавалеръяс любуйтчӧны наӧн да мелі кывъяс шуалӧны. Бал дырйи ветымын арӧса ань кылӧ асьсӧ томӧн, да и квайтымыныд сылы — дзоридзалан кад на.

— Ичӧтсянь радейта йӧктыны. Менам и бать-мам йӧктігӧн тӧдмасьлӧмаӧсь. Ме шуда, мый йӧктӧмыс ышӧдӧ найӧс радейтны олӧмсӧ, содтӧ вын-эбӧссӧ, кыпӧдӧ ловрусӧ, — висьталӧ Юлия Леготина, кодлӧн мамыс да батьыс, Людмила да Владимир Леготинъяс, дас вит во нин волывлӧны «Секрет молодости» школаӧ. — Мортыс кӧ йӧктӧ, ловнас сійӧ и сизимдас, и ӧкмысдас арӧсӧн лоас том. Бал вылас ме аддза сӧмын шань, восьса сьӧлӧма, югъялысь синма йӧзӧс, кодъяс радӧсь ӧта-мӧдныслы. Ме уна ветлӧдла мир пасьтала и быдлаын зіля тӧдмасьны мукӧд странаса йӧктӧмъясӧн. Быдмысь войтыр ӧнія ногджык йӧктӧны, та вӧсна зэв колана ловзьӧдны да нуӧдны татшӧм балъяссӧ.

Светлана Бузова шемӧсмӧма жӧ, мый Сыктывкарын олӧма войтыр босьтчӧмаӧсь йӧктыны. Ачыс абу жӧ бокӧ кольччӧма.

— Мирын ӧні уна лёкыс вӧчсьӧ, и кутам кӧ юксьыны ёрта-ёрткӧд муслунӧн, шань-бурӧн — ми сӧстӧммӧдам олӧмсӧ, вӧчам сійӧс шудаджыкӧн, — висьталӧ сійӧ. Йӧктігӧн юргысь шыладыс лӧсялӧ муслуныслы, шудыслы, та вӧсна и миянӧс дзоньвидзаӧнджык вӧчӧ. Сыктывкарын тайӧ балыс менам медводдза, позьӧ шуны, олӧмыс козьналіс сійӧс меным. И мед абу нин дас сизим арӧса, и мед ме абу Наташа Ростова, но йӧктігӧн кыла ачымӧс сэтшӧмӧн.

Ичӧтсянь кӧсйӧма йӧктыны и Татьяна Макарова. Дас вит во сайын локтӧма бальнӧй йӧктӧмъяслӧн школаӧ.

— Тані ми ставным пыдди пуктам ӧта-мӧднымӧс, ловнаным шойччам, — висьталӧ сійӧ. — Меным нимкодь, мый велалі йӧктыны да петкӧдча бал вылын.

Удораысь ань медводдзаысь локтӧма гажӧдчыны. Кыдзкӧ пӧ весиг эз вӧв лӧсьыд: ставӧн мичаа вӧччӧмаӧсь, а ме быдлунъя паськӧма.

— Ставӧн йӧктӧны, бергалӧны вальсӧн. И ме тшӧтш видлі, — шуӧ сійӧ. — Быттьӧ абу и сьӧкыд: видзӧд мукӧд вылӧ да на моз жӧ вӧч. Долыд, мый и Комиын ловзьӧдӧны бал нуӧдан традициясӧ. Аттьӧала сійӧс котыртысьясӧс, мый сетісны миянлы позянлун тайӧ рытӧ лоны принцессаясӧн!

«Секрет молодости» школаысь йӧктысьяс шензьӧдісны гӧсьтъясӧс и сям-кужӧмнас, и выль йӧктӧмъясӧн, и мича паськӧмӧн. На вылӧ видзӧдӧмӧн и гӧсьтъяс петавлісны йӧктан кытшӧ да вӧчлісны сійӧс, мый тшӧктыліс бал нуӧдысь Игорь Николайченко. Сьылӧмӧн гажӧдісны найӧс Альфия Коротаева да Ксения Дементьева.

— Кык час муніс балыс, а эг и казявлӧй, кыдзи кадыс лэбис, — пасйис гажлӧн режиссёр Ольга Третьякова.