ТАНІ ОЛАМ КЫПЫД ЛОЛӦН...
Верстьӧ том войтырлы йӧктанінын миянлысь тшӧкыда юасьлӧны, кӧні велалім татшӧм мичаа йӧктынысӧ. «Бальнӧй йӧктӧмъяслӧн рытъя школаын!» — тшапа вочавидзам ми.
Тайӧ воыс «Секрет молодости» бальнӧй йӧктӧмъяслӧн рытъя школалы тшупӧда.
Тӧдлытӧг лэбыштіс дас во, кыдзи чужис мӧвп котыртны йӧктыны велӧданінсӧ.
А сэки, 2006 вося декабрь 3 лунӧ, олӧма войтырлӧн прӧст кад коллялан юркарса шӧринын Марина Цибарт нуӧдіс медводдза занятие.
Вальс йӧктыны велӧдісны аньяс: Нина Смирнова да Галина Закаткина, Валентина Баландина да Александра Матвеева. Мужичӧйяс петкӧдчисны сёрӧнджык. И кык тӧлысь мысти танцпол вылӧ петіс медводдза гозъя — йӧктӧмӧн «ӧзйӧм» Нина да Володя Смирновъяс.
Январь 17 лунӧ Ниналы тырис 65 арӧс, а мартын Смирновъяс пасйисны ӧтув олӧмлы 45 вося тшупӧд.
Йӧктӧмын водзмӧстчӧм йылысь висьтасисны асьныс «том гозъя».
— Челядьдырсянь кӧсйи мичаа йӧктыны, — казьтылӧ Нина. — Кулӧмдін районса чужан Ярашъюын сэки олісны уна сикас национальносьта войтыр, и дзолясянь нин ме тӧдса молдаваналӧн, украинасалӧн, мариечлӧн сьылӧм-йӧктӧмӧн. Дзик на син водзын, кыдзи школаын перемена дырйи зонкаяс гудӧкасисны, а ми йӧктім мыйкӧ вальс сямаӧс. Ставӧн шуӧны вӧлі, мый менам медся бура артмӧ. Но коли нелямынысь унджык во, кор ме бальнӧй йӧктӧмъяслӧн рытъя школаын тӧдмалі классическӧй вальслысь правилӧяс.
Шемӧсмӧдана!.. Ме куті ёнджыка на радейтны тайӧ йӧктан сикассӧ. И менӧ кыскӧмӧн кыскӧ асланым школаӧ, тані ме ола, ола кыпыд лолӧн...
— Окота тӧдмавны выль движениеяс и ог кӧсйы кольччыны наысь, кодъяс петкӧдчӧны карса, ставроссияса дай войтыркостса йӧктан конкурсъясын, — пырӧдчӧ сёрниӧ Владимир. — Ми зілям петкӧдлыны орччаяслы став кужанлун-сямнымӧс, мыйӧ велӧдісны школаын...
Сёрни сайын лои гӧгӧрвоана, мый вальс дорӧ маэстролысь муслунсӧ чужтӧма батьыс, ичӧтдырйиыс на. Кыдзи и сиктса став мужичӧйыс, кодъяс «висьӧны» кыйсьӧм-вӧралӧмӧн, Владимир шмонитӧмсорӧн содтӧ:
— Тӧлысьысь дыр нин школаӧ котралысь гӧтыр ылӧдліс менӧ йӧктӧмӧн. И дженьыда кӧ, вальсыд «вермис»! Ӧні вӧр-ва да танцпол шӧрипельӧ юкӧны менсьым прӧст кадӧс.
Смирновъяслӧн патераӧ волігӧн ме видлалі газет-журналъясын бӧръя дас воӧн йӧзӧдӧм гижӧдъяс да тӧдмалі йӧктан школалысь подуласьӧм-сӧвмӧмсӧ.
И сідз, школа воссян воӧ йӧктыны велӧдчысьяс первойысь выступайтӧмаӧсь кино да прӧст кад коллялан «Октябрь» шӧринлӧн сцена вылын уджвывса ветеранъяслӧн рытпук дырйи. А 2007 вося ноябрын школаысь сизим гозъя петкӧдчӧмаӧсь нин «коймӧд арлыда войтырлӧн» бальнӧй йӧктӧм кузя карса медводдза конкурсын. Сэки Смирновъяс веськалӧмаӧсь вермысьяс лыдӧ. Декабрнас юркарса культура да искусство сӧвмӧдан керкаын школаса нуӧдӧмаӧсь выльвося бал, бӧрынджык сійӧ лоӧма быдвосяӧн.
Юаланныд, а коді мӧвпыштіс да лӧсьӧдіс бальнӧй йӧктӧмъяслысь рытъя школасӧ? Татшӧмнас нимӧдӧны Сыктывкарын олысьясӧс социальнӧя дорйӧм могысь государственнӧй отсӧг сетӧм кузя шӧринӧс. Веськӧдлысьнас вӧлі Л. Л. Афанасьева.
Йӧктӧм дорӧ муслун да школаын босьтӧм тӧдӧмлун отсалісны Смирновъяслы 2008 воын вермыны олӧма гозъяяс пӧвстын котыртлӧм «Идеальная пара» вермасьӧмын. А «коймӧд арлыда войтырлӧн» бальнӧй йӧктӧм кузя карса конкурсын вермӧмысь Нина да Владимир аттьӧалӧны школаын выль веськӧдлысь Игорь Николайченкоӧс. Мортыс 1983–1985 воясӧ вӧлӧма самодеятельнӧй художествоа творчестволӧн ставсоюзса смотрын лауреатӧн, 1987-ӧдын Москваын вермӧма бальнӧй йӧктӧм кузя йӧзкост творчестволӧн ставсоюзса мӧд фестивальын.
Дерт сэсся, став тӧдӧмлун-сямсӧ Игорь козьналіс Сыктывкарын йӧктыны велӧдчысьяслы.
2009 вося июльын Семьялы да радейтчӧмлы сиӧм лунӧ гаж дырйи вальс йӧктӧмысь карса администрация сетіс Смирновъяслы «За любовь и верность. Семья — единство помыслов и дел» казьтылан медаль. Гозъя пасйисны, мый тайӧ наградаыс — налысь ӧтувъя олӧмсӧ медся вылӧ донъялӧм.
Вальс лоис эз сӧмын Смирновъяслӧн, но кар-районса быдсикас конкурс-гаж дырйи школалӧн сідз шусяна визиткаӧн. 2010 воын йӧктан котыръяслӧн карса вермасьӧмын Нина да Владимир шедӧдісны медводдза места, налы вичмис бальнӧй йӧктӧмъяслӧн кубок.
Республикаса национальнӧй политика министерство, юркарса администрация да ветеранъяслӧн сӧвет отсӧгӧн В. Савин нима драма театрын кыпыда пасйисны бальнӧй йӧктӧмъяслӧн рытъя школалы вит во тырӧм. 2012 вося декабрь 10 лунӧ театрса сценасянь Сыктывкарса ветеранъяс водзын отчёта концертӧн петкӧдчисны йӧктыны велӧдчысьяс. На лыдын вӧліны и Смирновъяс. Гаж кежлӧ дас кык гозъялы вурисны выль костюмъяс. А карса медводдзаысь аддзисны абу профессиональнӧя йӧктысь мужичӧйясӧс фракын. Тайӧ сетіс школалӧн ыджыд сцена вылын петкӧдчӧмлы вылі тшупӧда, ошкана дон.
А сэсся вӧліны быдсикас конкурс-балын петкӧдчӧмъяс. Школаӧ ветлыны окотитысьыс пыр содіс. Талун татшӧмыс сэні кӧкъямысдас.
Чайта да, ог сорсьы, пасъя кӧ «Секрет молодости» велӧдчанінӧ котралысьяслӧн нимсянь, мый вальс — тайӧ медся нималана да романтичнӧй бальнӧй йӧктӧм.
Вальсын бергалігӧн кылан асьтӧ лэбачӧн, тэнӧ нинӧм оз кут ни оз дзескӧд. И весиг лэбачьяслы абу тӧдса сійӧ кыпыдлуныс, кодӧс козьналӧ гозъялы тайӧ шемӧсмӧдана йӧктаныс. Чуймӧдӧ йӧктысьяслӧн статьыс. Вальс — мича, сійӧс кокни велӧдны. А велалан кодыр, позьӧ юр кольмытӧдз бергавны кӧть кӧлысь, кӧть светскӧй рыт, кӧть чужан лун дырйи... Он эскӧй? Видлӧй! Збыльысь шуа, кажитчас!
