ЯМАЛ МУЫН КОМИ КЫВ ОЗ КУС
Кольӧмвося ноябрын уджмогӧн ветлі Ямалӧ, Тарко-Сале карӧ, кӧні меститчӧ «НОВАТЭК-Пуровский» котырлӧн биару конденсат переработайтан завод, Ямал-Ненеч асвеськӧдлан кытшын медшӧр предприятиеясысь ӧти. Сэні коркӧ уджавлӧма Дмитрий Кобылкин, Пур районӧн вӧвлӧм веськӧдлысь да кытшса ӧнія юралысь...
«Тарко-Сале» ненеч кыв вывсянь вуджӧдсьӧ, кыдзи «кык ю костын овмӧдчӧмин». Збыльысь, кар дортіыс визувтӧны Айваседапур да Пякупур юяс.
Зэв ёна воис сьӧлӧм вылӧ, мый тайӧ промышленнӧй карас пыдди пуктӧны вужвойтырлысь нэмӧвӧйся прӧмыселсӧ — чери кыйӧм.
Вужвойтырлысь важся оласногсӧ видзысь Лариса Дьячкова, кодӧс бура тӧдӧны культураын уджалысьяс, водз тулыссянь сёр арӧдз ассьыс прӧст кадсӧ коллялӧ ю дорын вугыр шатинӧн. Лариса Геннадьевна кыйӧ мича гӧрд ёкышӧс, а сэсся пуӧ-пӧжалӧ коми-изьватаслысь национальнӧй сёян...
Ань вит воысь дырджык нин веськӧдлӧ Тарко-Салеын олысь комияслӧн «Пурса изьватас» общественнӧй котырӧн, кутӧ топыд йитӧд миян республикакӧд, волывлӧ изьватаслӧн да коми войтырлӧн съездъяс вылӧ.
Лариса Геннадьевна 33 во зільӧма Ямал-Ненеч кытшын культура юкӧнын. 17 во веськӧдлӧма Тарко-Салеса национальнӧй культураяслӧн шӧринӧн. Эм сылӧн Россияса культура министерствосянь «За достижения в культуре» морӧсвывса пас.
Аньлӧн водзмӧстчӧмӧн кыпыд пожӧма ягын лӧсьӧдӧмаӧсь-восьтӧмаӧсь «Северный очаг» этнографическӧй парк. 3 во веськӧдлӧма сылӧн уджӧн. Паркас яран кӧр видзысьяслӧн квайт чум.
Сэтчӧ тшӧкыда волывлӧны карса олысьяс, торйӧн нин вужвойтыр. Нуӧдӧны и быдсяма конкурссӧ. А «Чумлӧн кӧзяйка» нимпасын быд во вермӧ коми-изьватасӧс петкӧдлысь ань.
Коми-изьватас окотапырысь ветлывлӧны Ноябрьск карӧ йӧзлысь ӧтувъялун пасъян гаж вылӧ. Сэні быд во котыртлӧны войтырсикаслӧн паськӧмлы сиӧм выставка. Петкӧдчӧны роч, украинеч, белорус, узбек, дагестанеч, армяна, ханты, манси, коми да мукӧд...
Тарко-Салеса 2 номера шӧр школаын важысянь жӧ нин нуӧдӧны челядьлысь «Все краски Ямала» национальнӧй культураяслы сиӧм фестиваль. 5-ӧд классаяс куим во дорвыв петкӧдлӧмаӧсь «Изьваса хоровод» гаж. Фестивальыслӧн режиссёрыс тшӧтш жӧ Лариса Дьячкова. Сійӧ жӧ котыртлӧ Коми Республикалы сиӧм небӧгъяслысь выставка. Лариса Геннадьевна кутӧ топыд йитӧд миян регионса национальнӧй политика министерствокӧд. Та вӧсна выставка вылас позьӧ тӧдмасьны став небӧгнас, кодъясӧс бӧръя кадӧ йӧзӧдӧны Комиын.
Лариса Дьячкова верӧс сайӧ петтӧдзыс вӧлӧма Рочева, чужлӧма Изьва районса Гам сиктын.
Архив пыр сійӧ туялӧма Рочевъяслысь рӧдсӧ. Вайӧдӧма важся пӧль-пӧчыслысь 68 ним-ов. А сідзжӧ Ямал-Ненеч да Ханты-Манси кытшъясысь туялӧма 53 Рочевӧс, кодъяс пуктӧмаӧсь юрнысӧ Айму вӧсна Ыджыд тышын.
Йӧзӧдӧм вылӧ дась нин «Семейный альбом ямальского рода коми-зырян Рочевых» небӧглӧн «Каслание на восток» медводдза юкӧныс.
Талун Лариса Дьячкова лӧсьӧдӧ тшӧтш ямалса сёрнисикас вылын коми-зыряналысь «Велӧдчам сёрнитны» разговорник...
Лариса Дьячкова — творчествоа морт. Ворсӧ гитараӧн да аккордеонӧн. Гижӧ коми да роч кыв вылын кывбуръяс. Саша пиыс — декоративно-прикладнӧй искусствоын зільысь. Елена нылыс — эстрадаса сьылысь. Окотапырысь ливкйӧдлӧ мамыслӧн кывбуръяс вылӧ лӧсьӧдӧм сьыланкывъяс. А сідзкӧ, Ямалын коми кыв оз кус, кутас юргыны и водзӧ.
