ЧЕЛЯДЬДЫРӦ ПИСЬМӦ

«...Сэні баба гожӧм, пелысь кисьмӧ,
Лыа пиын сузлясян — сьӧд няйт.
Югыд мӧвпыд уна, но он висьтав.
Меным комын куим, тэныд — квайт.

Шполькӧдчан ва гӧптын, коктӧ мыськан,
Качай вылын лэбан — дзирк да дзурк.
Челядьдырся сынӧд талань письтӧ,
Нӧкъя шаньга кӧрӧн ӧвтӧ тшук...

Ӧшкамӧшка юысь васӧ ырскӧ,
Бӧръя шоныд лунъяс сетӧ Ен.
Синмӧн весиг лапнитны ог лысьт ме.
Шуда кадӧй, эн на помась, эн...»

Олӧм-лыа чуньяс костті киссьӧ...
Локтӧ мелань тӧдса нюма ань,
Сетӧ киӧ вижӧдыштӧм письмӧ,
Сывйыштӧ да чӧла шуӧ: «Шань...»