* * *

Ставыс бур...
Письмӧ чукралі, шамырті киын.
Муна-шаркӧда
Эбӧстӧм коръясті.
Арыс ыпъялӧ гӧрда-виж биӧн.
Ставыс лоас на бур.
Нинӧм торъясӧ —
Кыдзи ловзьӧдін, сідзи и виин.

Абу пом.
Дзик юр пыдӧсӧ енэжыс инмӧ —
Руа вежӧрӧй
Сӧстӧммас-югдыштас.
Лунъяс вошта, и олӧмӧй чинӧ.
Бара казьтылӧм
Пысыштас-крукыштас,
Сӧмын ӧтчыд кӧ видзӧдлан синмӧ.

Воас кад,
Кор ми люкасям ӧти туй вылын.
Нэмъяс мысти,
Мӧд муын,
Выль олӧмын.
Тэнсьыд ловтӧ ме ылысянь кыла.
Гусьӧн мӧвпала: кытшовтны колӧма.
Аслым шӧпкӧда: мед жӧ ог ылав...