ТУРУНЛА
— Кыдзи нӧ пасьтасин? Чышъянась, гебйыс йирас, — шуис ыджыд мам да мыччис меным мича гӧрд чышъян. Сэсся видзӧдліс гӧгӧрбок, ставыс-ӧ кусӧдӧма, босьтіс ичӧтик улӧс да содтіс: — Мӧдам.
Ыджыд мамӧс ёна кыскис сиктбердса вӧр-ваыс, кӧть висьысь кокъяс лёка нин новлӧдлісны.
— Нинӧмтор, — нюмдыштас, — тшай юигмоз пуксьывлам, шойччыштам да водзӧ.
Тшайыс ыджыд мамлӧн век вӧлі медся чӧскыд: сук, сэтӧр коръя, юмов. Некор сэтшӧмсӧ эг юлы сэсся. Да и сьӧлӧм майыштана кӧра картупеля папуркасӧ некор нин сэсся ог видлы.
Лун джынсӧ ветлам вӧр дінті, ыджыд мам тшӧктӧ видзӧдлыны кок улӧ да корсьны колана турун. Ӧти пӧлӧс турун вылӧ индас да шуас, тайӧ пӧ гырктӧ бурдӧдӧ, мӧд пӧлӧссӧ тшӧктас вужнас нетшкыны, тадзи пӧ и косьта.
Некор эг вензьывны ыджыд мамкӧд. Нуӧдас вӧлі тӧварыш пыдди, да век муна, кӧть эськӧ дыш: гут-гаг дӧсадитчӧ, да и ёртъяскӧд окота гоньялыштны шоныд гожся лунӧ. Мӧвпала вӧлі: сы мыйта нук-нучка ыджыд мамлӧн, а вӧрӧ ветлыны пыр менӧ корӧ.
Вель ыджыда на кытшовтам ыбъяссӧ да видзьяссӧ, чукӧртам бурдан турунсӧ. Сэсся коркӧ ыджыд мам пуксяс сьӧрсьыс босьтӧм улӧс вылӧ да мӧдас казьтывлыны челядьдырсӧ — кыдзи война дырйи тшыг нисьӧ пӧт овлӧмаӧсь да сьӧкыд уджсӧ бертлӧмаӧсь. Быттьӧ веськавлан сійӧ кадас, сэтшӧм страк босьтлас. А ӧні пӧ майбыр олӧмыд, дитюкъясӧй, сӧмын морт ногӧн олӧй да красуйтчӧй. Унатор на эськӧ висьталас, но челядьыд челядь и эм. Гӧгӧрвоан али мый пасъявны казьтылӧмъяссӧ да сӧветъяссӧ. Чайтан, век кутасны овны, да быд здукӧ верман выльысь юавны, мыйкӧ вунӧ кӧ.
Гортӧ воам рытланьыс нин. Ыджыд мам шонтас пӧтка шыд, шӧралас шомакодь ас пӧжалӧм рудзӧг нянь, ывла вылад дыр олӧм бӧрад мурзӧмӧн сёям. Сёрнитігкості ыджыд мам шуас:
— Аттьӧ жӧ нин, муса ныв, мекӧд ветлін да, сьӧлӧм бурмис.
Сэсся вӧлисти гӧгӧрвоан, мый сьӧлӧм бурмӧмыс пӧрысь мортыдлы, гашкӧ, и эм медся ыджыд козиныс. Вӧлисти гӧгӧрвоан, мыйла ыджыд мамыд сы мында нукъяс пиысь корӧ тэнӧ. И яндзим босьтӧ, мый дыш вӧлі муннытӧ.
Кымын верстямман, сымын унджык пондан казявны. А олӧмыслӧн нырвизьыс ӧти: морт чужӧ да кулӧ. Некод абу помтӧм нэма. И некод таысь оз пышйы.
Сулала шойна вылын ыджыд мамлӧн гу дорас. Шыльӧда-чышкала буссьӧм фотосӧ. Мелі нюма, мусаник чужӧма — видзӧдӧ сійӧ ме вылӧ. И гӧлӧссӧ кыла:
— Лок, первой тшай юам мармелада кампетӧн.
Разя важиник гӧрд чышъянӧс, шӧпкӧдышта:
— Ыджыд мам, вайи тэныд мармелада кампеттӧ. Эн шогсьы, донаӧй, ме пасьтаси бура, гебйыд менӧ оз йир...
