ПОШТА КУД
Войвыв пилы. Палаззя. «Поплы чукӧртӧны налог» гижӧдыд оз мун. Оз кӧ йӧзыс асьныс сетны, попыд этша перъяс налогтӧ. Пияныдлы батьястӧ енлы эскӧмысь абу кокни дугӧдны. Ми чайтам, сійӧс тэ ачыд тӧдан. Бурджыка нуӧдӧй религиялысь ылӧглунсӧ крестьяналы висьтавлӧм.
Тӧдысьлы. Чуклӧм. Гырысь йӧз велӧдчӧм йывсьыд лэдзим газетын. «Аттӧ дивӧыд» оз мун; мый эськӧ оз висьтавны пемыд йӧзыд еретникъяс йывсьыд да. Колӧ югдӧдны найӧс, вештыны еретникъяслы эскӧмсӧ.
Ас мортлы. Сюзяыб. Некод ӧд оз шу самӧкур юӧмтӧ бур уджӧн. Кыдзи тэ тшӧктан (сӧветуйтан) вермасьны самӧкур пуысьяскӧд, дерт, оз шогмы. Кутшӧм нӧ ещӧ награда да ещӧ гусьӧн тэ чайтан сетіг государствоӧн самӧкур пуысьясӧс кутысьяслы либӧ висьталысьяслы. Быд гӧгӧрвоысь мортлӧн мог вермасьны самӧкур пуӧмкӧд кутшӧмкӧ награда кодсянькӧ виччысьтӧг. Повны да яндысьны самӧкур пуысьясӧс кутӧмысь нинӧм.
Безработнӧйлы. Кулӧмдін. Ми огӧ гӧгӧрвоӧ некыдзи тэнӧ, ёрт. Пыр мыйкӧ пойган, норасян, дзонь листъясӧн ас йывсьыд гижан. Сэсся тэныд став уджыс зэв нин омӧльӧн кажитчӧ. Быттьӧ нинӧм нин бурторйыс абу. Комиӧн гижан тэ лӧсьыда, сӧмын эн пойгы, эн бӧрд пыр сьӧд синваӧн. Эн гиж, мый абу, мый эз вӧвлы.
М. Кудиновлы. «Чери кыйӧм» стихотворенньӧыд оз мун, ёрт, абу артмӧма. Тэныд окота комиӧн гижны велавны? Гиж, ас саяд ӧд. Окота тэныд аддзыны ассьыд коми гижӧмтӧ газетын? Гиж мукӧдтор йылысь прозаӧн. Сэки и аддзан.
Чикышлы. Сыктывдінкар. Объездчик Комлин йывсьыд лэдзим газетын. Мукӧдыс оз мунны. Собессьыд сьӧм босьтысь гозъя йывсьыд эськӧ позис дай колі лэдзны газетын, да ним-овсӧ налысь абу гижӧмыд. Гиж, кодъяс найӧ — сэки лэдзам. Вичко старӧста йывсьыд нинӧм гижӧмысь. Вичкоӧдз миянлы абу мог.
Селькорлы. Волся. Тэ ӧмӧй чайтлін попъястӧ веськыд йӧзӧн? Не сэтшӧмторъяс на ӧд найӧ вӧчлывлісны. Газетын оз мун.
Ӧльӧк пилы. Ужга. Нывъяс вылын нартитчӧм йывсьыд газетын оз мун. Дерт, омӧля зэв зонъясыд вӧчӧны. Дай тэнадӧн гижӧмторйыд ставнас абу лючки.
Колеговлы. Ыб. Газетӧ гижтӧг позьӧ крестьянаыдлы висьтавны газет судзӧдӧм пӧрадок йывсьыд; оз мун.
Селькорлы № 210. Кыркӧтш. Кооператив йывсьыд статьяыд оз мун.
