СӦВЕТЪЯС ЁНМӦДӦМ

Быдӧн шуӧны: колӧ пӧ лӧсьӧдны бур сельсӧвет. Кокни тадз шуны, лӧсьӧдныс тай сьӧкыд. Бур сельсӧвет кӧ колӧ, быд тӧлка, олӧм йылысь думайтысь крестьянинлы, коммунистическӧй ячейкалы, удждысяна-отсасяна комитетъяслы, комсомоллы, профсоюзлы — быдӧнлы колӧ зільны лӧсьӧдны сэтшӧм сельсӧветсӧ. Уна во сы вылӧ ковмас пуктыны. Сельсӧветӧ бӧрйигӧн воысь воӧ йӧзтӧ колӧ ёнджыка сысъявны, видлавны гӧгӧрбок, медым зільджыкъяс да веськыда (честно) уджалысьясджык сюрисны сэтчӧ.

Коммунистическӧй ячейкаяслы колӧ зільны, медым сельсӧветъясӧ веськаласны сэтшӧм йӧз, кодъяс вылӧ надейтчӧны крестьянаыс, кодъясӧс асьныс найӧ окотапырысь бӧрйӧны. Коммунистическӧй ячейкалы оз ков мырдӧн сюйны ассьыс кандидатъяссӧ сельсӧветъясӧ.

Сӧветскӧй власьт нарошнӧ нюжӧдчис Ставреспубликаса Сӧвет съезд чукӧртӧмысь, медым сельсӧветъясӧ да волисполкомъясӧ быдлаын вевъяласны бӧрйыны йӧзӧс крестьяна пиысь, кодъяс налы колӧны. Кӧні вӧлі бӧръялӧмаӧсь нин, Сӧветскӧй власьт выльысь тшӧктіс бӧръявны: мед пӧ бӧрйигӧн некӧн некутшӧм мырдӧналӧм эз вӧв.

Тӧдӧмысь, и выль пӧв бӧрйӧмыд сельсӧветтӧ оз на другӧн бурмӧд. Дыр ковмас уджавны. Лоӧны комиссияяс, сёрнитӧмъяс, сӧвещанньӧяс, пондасны сэні велӧдны водзмӧстчысь крестьянаӧс удж нуӧдны сельсӧветъясын, волисполкомъясын. Сэсся вӧлисти, найӧ велӧдчӧм бӧрын, лоӧны бурджык уджалысьяс. Сельсӧветъяс, волисполкомъяс сэки вӧлисти сувтасны кок йыланыс.

Коммунист партия видзӧдӧ водзмӧстчысь беспартийнӧй крестьянин вылӧ зэв бура, партийнӧй вылӧ моз жӧ. Партия сӧмын мырсьӧ, медым сӧветъясӧ оз веськавны кутшӧмсюрӧ лёк йӧз: кулакъяс, Сӧветскӧй власьтлы воча мунысьяс, горлопанъяс, аслас зеп понда уджалысьяс. Партиялы колӧ, медым Сӧветъясыд чорыда нуӧдісны ассьыныс уджсӧ Советскӧй власьт ёнмӧдӧм, бурмӧдӧм кузя, медым Сӧветъясын уджалісны крестьяналы колан войтыр.

С. Ингулов.