СССР-са ЦИК-лӧн 3-ӧд СЕССИЯ

Локтан вося сельхозналог йылысь.

300 миллион шайтысь унджык не босьтны.

ТИФЛИС. Март 7-ӧд лунӧ ЦИК сессия вылын Брюханов ёрт вӧчис доклад сельскокӧзяйственнӧй налог йылысь. Сійӧ шуис: «Ӧнія сельскокӧзяйственнӧй налог ыджыд, мынтыны сійӧс ёна на сьӧкыд. Колӧ кыдзкӧ зільны чинтыны сійӧс. Совнарком шуис локтан во вылӧ (1925−1926 во) пуктыны став налогсӧ 300 миллион шайт. Дерт эськӧ бурджык вӧлі налогтӧ босьтны быд керка юрысь нажӧтка серти (унджык кӧ нажӧвитан, ыджыдджык вот мынтан), да ӧні сідзисӧ лӧсьӧдныс оз на позь: огӧ тӧдӧй лючки, коді мыйта нажӧвитӧ во гӧгӧрӧн — учётыс абу. Сы вӧсна локтан воӧ воттӧ пондасны артавны овмӧс серти: видз-му да скӧт серти. Совнарком сэсся думайтӧ сё миллион шайт вотысь локтан воӧ кольӧдны вӧлӧсьтъясӧ бурмӧдны вӧлӧсьтса бюджет.

Рытнас сессия вылын муніс сёрни сельскокӧзяйственнӧй налог йылысь. Сы бӧрын бара висьталіс Брюханов ёрт. Сійӧ лыддис, кутшӧм постановленньӧ эськӧ колӧ вӧчны сельскокӧзяйственнӧй налог йылысь 1925−1926ʼ во вылӧ.

Брюхановлысь лыддьӧм резолюциятӧ сельскокӧзяйственнӧй налог йывсьыд сессия шуис пыдди пуктыны. Резолюцияас урчитӧма: «1925−1926ʼ во вылӧ сельскокӧзяйственнӧй налогтӧ, тшӧтш местнӧй бюджетӧ содтӧдӧн, колӧ лӧсьӧдны сідзи, медым оз кай 300 миллион шайтысь вылӧ. 100 миллион шайт став вотсьыс сетны вӧлӧстнӧй да районнӧй бюджетъясӧ. Вот мынтан кадтӧ оз ков вежлавны.

Кор шуӧма, тшук мед сэки и мынтӧма. Вот мынтавны закон серти. Местнӧй удж нуӧдысьяслы водзджык юӧртавны вот мынтӧм срокъяс йылысь».

Сэсся сессия вылын уджалысь финансӧвӧй комиссиясянь вӧчис доклад Куйбышев ёрт. Комиссиялысь индалӧмсӧ шуисны пыдди пуктыны. Ӧти кывйӧн (единогласно) сэсся лӧсьӧдчисны резолюцияӧн Закавказьеса правительство уджалӧм йылысь да амнистия сетӧм йылысь.

Сессия помавтӧдз, дзик нин медбӧръя морт, сёрнитіс Петровскӧй ёрт. Сійӧ дженьыдика висьталіс ставсӧ, мый вӧчисны сессия вылын.

Сессия сы бӧрын помасис.

Калинин ёрт уджалӧ.

ТИФЛИС. Сессия ЦИК СССР помасьӧм бӧрын Калинин ёрт ветліс кымынкӧ вӧлӧсьтӧ рытывладор Грузияын. Быдлаын чукӧртчылісны митинг вылӧ. Калинин ёрт юасьліс крестьяналысь, абу-ӧ налӧн кутшӧмкӧ норасьӧмъяс Сӧветскӧй власьт вылӧ. Ӧти вӧлӧсьтын тӧдмаліс сійӧ — крестьянинӧс арестуйтӧмаӧсь кулысь мам дінас попӧс вайлӧмысь. Калинин ёрт эз ошкы сэтшӧм аресттӧ, тшӧктіс пуксьӧдны асьсӧ — арестуйтысьсӧ.

Раковскӧй ёрт сессия помасьӧм бӧрын ветліс Сухумиӧ. Сёрнитіс сэні митинг вылын.

Туй вылын.

ЦИК СССР Тифлисысь петіс март 7-ӧд лунӧ. 8-ӧд луннас воисны нин найӧ Ленинскӧ. Паныд налы вокзал вылӧ чукӧртчӧмаӧсь зэв уна йӧз. Кар площадь вылас вӧчисны митинг. Сёрнитісны сэні тшӧтш Тифлиссянь воысьяс — ЦИК-са шленъяс. Март 9-ӧд лунӧ воисны найӧ Эчмиадзин карӧ — армяна позйӧ (армяналӧн культураыс медвойдӧр кыптӧма тані). Митинг жӧ вӧчӧмаӧсь. Рыков ёрт гарыштӧма сэні: Советскӧй власьт дырйи пӧ весиг пинь вежынь на эз мунлы тані уна пӧлӧс олысь костын, войдӧр пӧ эз дугдывны зыксьӧмысь.

Митинг бӧрын ЦИК СССР автомобильясӧн мунісны Эриваньӧ. Сэні бара на митинг вӧлӧма. Йӧзыс вӧліны зэв уна сюрс. Чолӧмбыттьӧ кывъяс висьталӧмаӧсь Рыков, Чичерин, Будённӧй, Подвойскӧй да мукӧд ёртъяс.

Грузияын вӧлі пукӧдалӧны уна мыжмӧм мортъясӧс вера понда. Сессияыд сетіс налы амнистия (мездіс). Ӧні унаӧс лэдзисны. Лэдзӧмаӧсь тшӧтш армяналысь патриархсӧ (католикосӧс).