МЫЙЛА ФЕВРАЛЬСА РЕВОЛЮЦИЯ БӦРЫН КРЕСТЬЯНАЛЫ ЭЗ ЛО МУ НИ, МИР НИ

Сарӧс чӧвтӧм бӧрын Россияын власьтыс лои временнӧй правительство киын. Тайӧ правительствоас вӧліны сӧмын озыръяс да помещикъяс. Ӧти кадӧ сыкӧд лои медводдза (Питерса) Сӧвет. Сы бӧрся мунісны став рабочӧйясыс и салдатъясыс; Сӧвет киын вӧлі став оружйӧыс и выныс. Позьӧ вӧлі лыддьыны тайӧ Сӧветсӧ прамӧй власьтӧн эськӧ.

Сӧмын тай эз ло сідзи. Сӧветыс ас вӧляысь сетіс власьтсӧ озыръяс киӧ. Мыйла? Сӧветас вӧліны унджыкыс озыръяс дор сулалысьяс — эсеръяс да меньшевикъяс. Рабочӧйяс да салдатъяс омӧля на вӧлі сэки тӧдӧны, кутшӧм партия кытчӧ нуӧдӧ; найӧ надейтчисны эсеръяс вылӧ да меньшевикъяс вылӧ, а тайӧяс власьтсӧ сетісны озыръяслы. Эсеръяс да меньшевикъяс арталісны тадзи: Россияын пӧ йӧзыд пемыдӧсь, нинӧм оз гӧгӧрвоны; рабочӧйяслы да крестьяналы пӧ революция нинӧм вылӧ не вӧчлыны; та серти пӧ позьӧ шуны — тайӧ революциясӧ вӧчисны озыр йӧз, налы пӧ и власьтсӧ колӧ сетны.

Ӧні сэсся мӧвпыштамӧ: вермис-ӧ озыр власьт помещикъяслысь муяссӧ босьтны да сетны крестьяналы? Дерт жӧ, эз. Ӧти-кӧ, озыръяс киын вӧлі муыс уна, жаль вӧлі налы сетнытӧ; мӧд-кӧ, помещикъясыс асьныс вӧліны тшӧтш временнӧй правительствоас. Сы вӧсна крестьяналы и шуисны: пукалӧй пӧ ті шы ни тӧв да виччысьӧй учредительнӧй собранньӧ, сійӧ пӧ тіянӧс мунад и быдторйӧн наградитас. А учредительнӧй собранньӧлысь сроксӧ пыр ӧтарӧ нюжӧдӧны да нюжӧдӧны. Буржуйяс сы кості кӧсйисны асьныс ёнмӧдчыны да чукӧртны мӧд пӧлӧс учредительнӧй собранньӧ — буржуйскӧйӧс.

Видз-му уджалӧм вылын министрын вӧлі эсеръяслӧн нырщикыс — Чернов. Сійӧ весиг чуньнас эз бергӧд крестьяналы видз-му лӧсьӧдӧм йылысь. Кӧнсюрӧ кутісны самӧвӧльнӧя босьтавны помещикъяслысь муяссӧ крестьянскӧй комитетъяс; сэки мӧд министр — Авксентьев (государство пытшкын пӧрадок лӧсьӧдысь) пондіс кутавны сыысь крестьянаӧс да пуксьӧдавны найӧс тюрмаясӧ.

Тадзи медколанторъяс крестьяналы изменитісны эсер министръяс.

Сэтшӧм жӧ лои и миритчӧм йылысь. Буржуйяс некыдз эз кӧсйыны регыдӧн помавны война. Ӧти-кӧ, найӧ зілисны ас кианыс босьтны Константинополь да Дарданеллы (Турцияын); мӧд-кӧ, эз кӧсйыны ӧбӧдитны Францияса да Англияса буржуйясӧс — ассьыныс союзникъясӧс: найӧ киын вӧліны уна банкъяс да капиталъяс роч буржуйяслӧн.

Эсер Керенскӧй приказ сетіс россияса войскалы мунны немечьяс вылӧ, вӧчис наступленньӧ юнь 18-ӧд лунӧ 1917 воын. Мыйта сэки россияса уджалысь йӧз усины! Министр-меньшевик Церетели тшӧктӧ вӧлі лыйлыны салдатъясӧс (рабочӧйясӧс да крестьянаӧс), кодъяс оз кутны воюйтны буржуйяс вӧсна.

Кор власьтыс вӧлі буржуйяс киын да лёк партияяс киын, кор налы рабочӧйяс да крестьяна веритлісны — дерт, му ни, мир ни крестьяна эз вермыны виччысьны.

Мусӧ и мирсӧ крестьяна перйисны мӧд революцияӧн — Октябрсаӧн. Тайӧ ыджыд революцияыс нетшыштіс Россияӧс грабитчан войнаысь да став мусӧ сетіс уджалысь йӧзлы вӧдитчыны.