КЫДЗИ УСИ САР ВЛАСЬТ

Кӧкъямыс во сайын, талунъя лунӧ Россияын лои революция — февральса революцияӧн шусьӧ.

Эз кокньыда воны татчӧдз рабочӧйяс да крестьяна. Уна вир кисьтісны, уна лов пуктісны туй выланыс, саркӧд да сар вӧсна косясигӧн. Уна во ковмис крестьяналы прамӧя тӧдмавны «сар-батюшколысь» чужӧмсӧ, сямсӧ. Дыр эз казявны пемыд крестьяна, код дор олӧ-вылӧ сар, кодӧс видзӧ быдсяма лёкысь, кодӧс дорйӧ, кодлы отсалӧ. Сарыд пыр сулавліс озыръяс дор, помещикъяс дор, пыр вӧвлі медлёк врагыс уджалысь йӧзлы. Сарыд ачыс вӧлі медыджыд помещик — сылӧн муыс да вӧрыс вӧлі лыддьыссьӧ миллион десятинаясӧн, ставыс медбур.

Японскӧй война петкӧдліс крестьяналы: сарыд вӧлӧма зэв омӧлик морт. Озыръяс вӧсна, весьшӧрӧ дзик, уджалысь йӧзлысь вир кисьтіс ваӧс моз.

Сы бӧрын 1905 воын рабочӧйяс босьтчылісны эськӧ революция вӧчны да, крестьяна налы эз отсавны. Оз на вӧлі сэки гӧгӧрвоны найӧ: сӧмын ӧтвылысь рабочӧйяскӧд вермасьӧмӧн позяс мездысьны дзескыд олӧмысь.

Крестьяналӧн овмӧс сы бӧрын пыр ӧтарӧ кутіс омӧльтчыны-киссьыны, вотъяс пондісны воысь воӧ содны да содны — дзик матӧ (пикӧ) воисны крестьяна.

Озыр сар сы вылӧ ещӧ на выль пекля крестьяналы лӧсьӧдіс — немечьяскӧд война паніс. Тайӧ война дырйи Россия воштіс куим миллион да джын мортӧс — ставыс найӧ рабочӧя-крестьяна пӧвстысь. Пӧшти куим во кыссис му вылын вӧвлытӧм кось. Сэки дзикӧдз нин рӧзӧритчыны кутісны крестьяна. Офицеръяс (озыр дворяна пиян) война вылын дугдывтӧг вузавлісны салдатъясӧс. Салдатъяс окопъясын тшыгъялісны, тойясӧс вердісны, быд ногыс мучитчисны. Дзикӧдз кутіс гӧгӧр пом воны, нинӧмӧ вошны пондіс Россия.

Рабочӧйяс эз вермыны водзӧ нюжӧдны татшӧм олӧмсӧ, кыпӧдчисны, вӧчисны революция. На дор сэки сувтісны крестьяна (салдатъяс), ӧтув вермисны, чӧвтісны сарӧс, гиля-голя пӧри сылӧн троныс.

Революциясӧ эськӧ вӧчисны рабочӧйяс крестьянакӧд да, сӧмын власьтыс эз ло найӧ киын: власьтсӧ босьтісны озыръяс да на дор сулалысьяс — эсеръяс, меньшевикъяс. Война эз помась, муяс помещикъяслысь эз босьтавны да сетавны крестьяналы.

Сэки заграничасянь Россияӧ локтіс Ленин. Кутіс сійӧ чукӧртны прамӧй революционеръясӧс-большевикъясӧс (коммунистъясӧс).

Кӧкъямыс тӧлысь мысти лои Октябрса революция. Сэки вӧлисти война помасис, озыръясӧс вӧтлісны, власьтсӧ босьтісны рабочӧйяс да крестьяна асланыс киӧ — лӧсьӧдісны Сӧветскӧй власьт. Став эмбурыс, мый эм Россияас, лои уджалысь йӧзлӧн.

Февральса революция вӧлі ӧдзӧс пырны Октябрса революцияӧ.

Крестьяна, топыда ӧтувтчӧй Сӧвет власьт дінаныд да коммунист партия дорӧ!