ВИНА КОРЫСЬ

Петіс Анна ывла вылӧ,
Гӧгӧр пемыд, гӧгӧр лӧнь.
Степан Ӧльӧ локтӧ кылӧ,
Гудӧк нязйӧ «курня-ринь».

Локтіс, сувтіс, шуӧ нывлы:
— Тэ нӧ ӧтнад тані мый?
Парта вина пыр мед вӧлі,
Юны колӧ тайӧ вой!

— Вина абу, Ӧлюк! Аски
Батьлысь гуа пуд джын пызь,
Трипан Ӧдьлы сійӧс кыска — 
Винад артмас регыд сэсь.

— Талун колӧ, — шуис Ӧльӧ.
Босьтіс нылӧс — колс да колс.
Анна гатшӧн тутіс ылӧ,
Няйтӧ уси булска-болс.

— Мый нӧ лоин, Ӧлюк?!. Дугды!.. —
Ӧльӧ босьтіс плака пом.
— Он кӧ кер тэ мый тэд тшӧкті — 
Татчӧ вӧча тэныд пом!

Анна чеччӧ. Ӧльӧ сылы
Мышкас тэчӧ пескӧн ноп.
Ныв сэн кевмӧ. — Ӧльӧ, сулав,
Вывті эн дур, эн тадз лыб!

— Вай мен вина! — Аски тшукӧм...
Талун абу ӧти войт.
Аски кера тэнсьыд тшӧктӧм,
Талун абу, ви кӧть нӧйт...

— Лӧсьӧдін мед меным водзвыв!
Эн кӧ лӧсьӧд — он и мын!..
Ме тэ вылын сарыс ачым
Тшӧкта, б..., кывзы мен!

Унаысь, унаысь ме тэд шулі:
Лӧсьӧд быд рыт вина мен,
Али ӧнӧдз тэ эн кывлы?
Эн кӧ кывлы — ёрис ен!

Тасма коссьыс Ӧльӧ разис.
Скӧрапырысь мать да мать,
Кимӧдз тырнас, быттьӧ пузис,
Босьтіс нывлысь юрси прать.

Вой нин вӧлі. Гӧгӧр узьӧ,
Гӧгӧр пемыд, гӧгӧр лӧнь,
Сӧмын кылӧ тасма сюся
Ӧльӧ киын ветлӧ «швунь».

Нора кевмӧм кадӧн кывлӧ:
— Ӧльӧ, эн нӧйт, дугды тадз.
Воча шуӧм кылӧ сылы:
— Мӧдысь вина водзвыв вӧч!

Сьӧд вой узьӧ, сьӧд вой пемыд.
Вӧлӧсьт вылын абу морт.
— Дугды, кевма, Ӧлюк, тэныд,
Сэсся тырмас, эн нин варт!

Тасма швуньгӧ, тасма швачкӧ.
Кылӧ мортлӧн ырзӧм шы:
— Абутӧмсӧ он жӧ пычкы! —
Зонлы кевмӧ коньӧр ныв.

Петӧ кыа, югӧр вӧчис.
Вӧр йыв лои чим гӧрд мырд.
Нылӧс зонмыд кисьыс лэдзис.
Ӧдйӧ аддзис сійӧ горт.