«ЭН КОДЙЫ ЙӦЗЛЫ ГУРАН, АЧЫД ДЖӦМДАН»
Ӧтчыд заводысь вӧлі петӧ коми зимогор, Иван нима; кокньыдик пиджака, опоркиа, мышкас ноп зэв сьӧд дӧраысь, нопъяс тырыс нинӧм. Став нажӧткасӧ юӧма, локтӧ подӧн, кыт корыштӧ, кыт вотыштӧ. Ӧтик вӧлӧк вуджигӧн ӧтлаасяс сыкӧд киссьӧминик поп паськӧма морт, шусьӧ странник. Сідзжӧ нопъя, нопъяс тырыс нинӧм, бокас кружка: ӧктыся пӧ выль вичко стрӧитны; кружкаас грӧш абу. Луннас ӧктысьӧ, рытнас кабакын кружкасӧ юкӧ.
Сідз кык друг мӧдісны мунны. Зимогорлы кутшӧм кусӧк сетасны, сійӧ и ладнӧ, сійӧс и курччыштӧ; странник кусӧк оз ӧкты: сылы сет тьӧтка гривенник да дас сизим ур, а рытнас кык друг пӧкмелитчӧны. Странниклӧн сьӧм, зимогор вина корсьӧ.
Ӧтик асылӧ петісны вӧлӧк вуджны, юрныс зэв ёна висьӧ. Странниклы зэв делӧ мунны. Ӧстатки керка бердсьыс аддзисны дадь. Странник шуӧ: тайӧс пӧ босьтам да мӧда-мӧднымӧс кыскам. Зимогор шуӧ: босьтам пӧ — сійӧ быдтор вылӧ сӧгласитчӧ. Странник шуӧ, тэ водзвылас кыскы менӧ; кыскыны сэтчӧдз, кытчӧдз оз помась менам сьыланкыв; менам мыйӧн помасяс, сэки тэ сьыв, а ме кыска.
Странник даддьӧ гатш водіс, горӧдіс сьывны, а зимогор Иван кыскӧ. Странник быдсяма сьыланкывтӧ сьыліс да сьыліс, зимогор пыр кыскӧ. Кыскис нин бура верст нёль. Сэсся коркӧ странник даддяд и унмовсис — сьывны дугдіс. Зимогор кыскӧмысь дугдіс: шусисны, кытчӧдз сьыланкыв тырмас — сэтчӧдз и кыскыны; сьыланкыв помасис — и кыскӧм помасис. Зимогор Иван странникӧс чуксаліс. Сэсся пӧ меным кад воис пукавны. Странниклы эськӧ зэв абу сьӧлӧмсьыс кыскыны да, шусьӧма сідзи — быть. Странникыс вӧлі роч, а зимогорыд коми.
Пуксис зимогор даддьӧ, горӧдіс сьывны комиӧн, а странник кыскӧ. Странник вель ёна нин кыскис, а зимогор пыр дуалӧ комиӧн.
Кыскис нин верст дас, а зимогорлӧн сьылӧм век оз помась. Странник юалӧ: оз-ӧ на пӧ помась сьылӧмыд? Зимогор воча шуӧ: менам пӧ ещӧ аски тырмас на. Странник повзис, шуӧ: ме пӧ мудзи, сэсся пӧ кыскыныд ог вермы. Зимогор шуӧ: он кӧ пӧ вермы, абу на миянлы невӧля, ме пӧ верма подӧн мунны. Зимогор чеччис. Дадь туй шӧрӧ эновтісны — тыртӧм дадьтӧ коді кыскас.
Коркӧ рытнас воисны вӧлӧсьтӧ. Пырисны медводдза керкаас, кӧзяйкаыс абу, посни челядь ас кежаныс, сетны нинӧм оз вермыны, вердны нинӧм оз кужны корсьны. Странник и шуӧ: «Эн кӧ нинӧм сетӧй, ми асьным аддзам» — чипан позсьыс босьтіс ӧти чипанӧс, юрсӧ песовтіс, челядь вылӧ горӧдіс да чипанӧс и нуис. Сикт мӧдар помас узьмӧдчисны. Тьӧткалы странник тшӧктіс ломтыны пач да чипан пуны. Сэк кості зимогор керка нольӧ-витӧ ветліс, нянь корис. Локтӧ, кусӧк нёль-вит нянь вайӧ.
Странникыд арталӧма ас кежас: ӧтик чипаннад пӧ кыкӧннад огӧ пӧтӧй — кӧсъяс пӧръявны зимогорӧс. Зимогорлы шуӧ: «Талун куш няньнас ужнайтам да водам, чипантӧ огӧ сёйӧй. Кодным бурджыка вӧтасям, аски и чипан сылы». Зимогор быдтор вылӧ сӧглас. Позьӧ и сідз. Нянь сёйисны и водісны. Странниклӧн сьӧлӧм нуртор лои, сэсся мудзӧм вылад да, зэв чорыда унмовсис, быдӧн ныргорӧн узьӧ. Зимогорлӧн оз узьсьы тшыг кынӧмӧн, куйлӧ дай думайтӧ: тшыгнад пӧ оз узьсьы, дай важ йӧз шулӧмаӧсь: «ужнайттӧгыд пӧ лёк вӧт вӧталан». Тадзинад ме чипантӧ ворсся. Видзӧдӧ, странник зэв лӧсьыда ныргорӧн узьӧ. Чеччас, чипан пачысь кыскас да ставнас и сёяс. Сэсся зэв бура, пӧт кынӧмнад унмовсяс.
Аскинас странникыд водз садьмӧма, зимогорӧс чуксалӧ. Коркӧ чеччис и зимогор. Мыссисны. Странник и шуӧ: ёна жӧ пӧ ме бура вӧтаси: «Быттьӧкӧ ме узя — сэсся небесасянь лэччисны кык андел, да менӧ ловйӧн райӧ лэптісны».
Зимогор сэтчӧ шуӧ: «Аддзылі, аддзылі, кыдзи тэнӧ раяд лэптісны. Ме думайті: мися, тэ раяд воин да, сэтысянь чипантӧ сёйны он нин лок да, ме чипантӧ и сёйи».
Странник толькӧ балябӧжсӧ гыжъялан бура вӧтасьӧмнад коли. Ачыс думайтӧ: «Кӧсйи ӧтнам чипантӧ сёйны, бура вӧтасьӧмнад, а раяд кайӧмӧн чипантӧ и ворсси».
Сэсся странник зимогор дінысь торйӧдчис. Зимогор пондіс ӧтнас водзӧ гортлань локны.
В. А. Худяев.
