СЁРНИ ВЕРУЙТЫСЬЛӦН ВЕРУЙТТӦМКӦД

Исполкомӧ пырӧ ӧти морт, шапка юрысь оз босьт, кӧсйӧ пырны юралысь дінӧ. Ӧдзӧс дорын сувтӧдӧ сійӧс вичкоса служак, дерт буракӧ, юралысьыс, мыйкӧ тай зэв скӧр-а.

«Эй, Микита Иванович, вай сулавлы, зон! Мый но ті кутінныд керсьыны деревняад? Ті гижсьӧмныд „Безбожник кружокӧ“, рӧштвокӧд паныд вӧчанныд спектакъяс. Абу ӧд тадзи лӧсьыд. Вай висьтавлы, кодъяс сэтчӧ гижсялінныд, вай меным список. Меным зэв сійӧ колӧ. А татшӧм спектак вӧчӧмъяссьыд лоӧ норасьны»... (оз тӧд, кодлы, мытшасис).

Веруйттӧм морт збоя воча сылы висьтавлӧ. «„Безбожник кружокӧ“ миян деревняын гижсисны 13 морт, 2 нывбаба, попъяслы та бӧрын, буракӧ, регыд лоас пом. Гижси первой ме, сэсся мукӧд, а кодъяс — асьныс регыд висьталасны. Та бӧрын миянлы оз ков поп ни, вичко ни, кулам кӧ, асьным дзебсям асланым кладбище вылӧ, ас ногӧн. Праздник дырся ӧктысьӧм да руга пай сетам асланым мӧда-мӧдлы отсасян комитетлы. Рӧштвокӧд паныд вӧчлім спектак, пуктім «Райын». Сэні зэв вӧлі гажа, быдӧн ошкисны. Пукалісны бура унаӧн, вӧліны олӧма йӧз. Кутам вӧчны и водзӧ. Корам мӧдысь кежлӧ тшӧтш тэнӧ сэтчӧ»...

Вичкоса служак сьӧлыштас да пышъяс.

Веруйттӧм.