СССР-са ЦИК-лӧн 3-ӧд СЕССИЯ

Тифлис. ЗСФСР правительство удж йылысь висьталіс ЗСФСР Совнаркомса юралысь — Орахелашвили. Сійӧ индіс, кутшӧм бур вермас лоны Закавказьеысь СССР-лы.

Закавказьеыд пӧ лыддьыссьӧ поскӧн Европасянь вуджны Азияӧ. Сэсся Орахелашвили висьталіс Кавказса олӧм-вылӧм йылысь, кӧзяйство йывсьыс. Нерп перйӧм пӧ содӧ зэв ӧдйӧ — тӧлысьӧн-тӧлысьӧн. Ёна бурмӧ марганцевӧй руда перйӧм (кӧрт руда); сы йылысь тӧдӧны нин ӧні му пасьтаас. Кыпалӧ и крестьяналӧн кӧзяйство. Эжа перйӧм Закавказьеын войнаса кадкодьса нин. Медъёна вӧдитӧны тані хлопок (сыысь вӧчӧны ситеч да мукӧд пӧлӧс бумажнӧй тӧвар). Скӧт вӧдитӧм пӧ омӧля мунӧ, некыдзи на оз вермыны война бӧрын выльысь лӧсьӧдны скӧтсӧ. Сэки пӧ нулісны татысь джын скӧтсӧ. Орахелашвили сэсся шуӧ: велӧдчӧм пӧ ӧні миян сэтшӧм бура мунӧ, кыдзи воддза меньшевистскӧй правительство эз весиг мӧвпавлы. Кӧні войдӧр весиг школаыс абу вӧвлӧма, ӧні сэні уна школаяс, эмӧсь бурдӧдчанінъяс. Азербайджанын Сӧветскӧй власьт дырйи нин восьтӧма университет (ыджыд школа), политехническӧй институт да государственнӧй консерватория. Азербайджанскӧй ичӧт школаясын велӧдчӧны ӧні 107.366 челядь; ыджыд школаясын — 6000. Унджыкыс тюркскӧй челядь. Азербайджаныд лыддьысьыліс миян медпемыдӧн, медомӧля сэні велӧдчӧмыд мунліс. Орахелашвили шуис: Закавказьеын пӧ олӧм нуӧдӧм да олӧмӧн веськӧдлӧм (политика) чорыд киын, мунӧ шыльыда, оз шатлась. Колян вося август тӧлысьын кыпӧдчылӧм меньшевикъяслӧн Грузияын мукӧд государствоясӧн ышӧдӧм кузя вӧлі. Ассьыс докладсӧ Орахелашвили помаліс сёрниӧн Гӧрд Армия йылысь.