МЫЙ БУРСӦ СЕТӦ ВӦВЪЯСӦН ВЕНЗЬӦМ

Вӧскресенньӧӧ, март 1 лунӧ, Сыктывдінкарын вӧлі вӧвъясӧн вензьӧм (бега). Вензьыны удитісны сӧмын ӧдйӧ-тэрыба котӧртӧм вылӧ. Колян вӧскресенньӧӧ, март 8-ӧд лунӧ, бара вӧлі вензьӧм вӧвъяслӧн вынлуннаныс.

Ми ӧні ставным тӧждысям сы йылысь: кыдз эськӧ бурмӧдны вӧв рӧд коми йӧзлысь — крестьяналысь. Крестьянинлы колӧ ён вӧв, мед эськӧ быдтор вермис уджавны: сьӧкыд груз кыскавны и, мед вӧлі тэрыб и, пельк и, ӧдйӧ котӧртысь. Миян крестьяна костын эмӧсь бур кӧбылаяс, но бур ужъясыс сэтшӧм рӧдсӧ паськӧдны эз вӧвны. Сы понда миян Обласьтувса Земельнӧй Отдел лӧсьӧдіс бур ужъясӧс. Миян Печӧраса, Изьваса да Туглимса вӧвъяс лыддьыссьӧны бурӧн — рӧдыс сэні бур, мӧд ногӧн кӧ висьтавны, веськавлӧма коркӧ налы бур рӧд-вирыс. Бур вӧвъяс эмӧсь и мукӧд вӧлӧсьтъясын, кытчӧ ёнджыка веськавлӧма бур вира рӧдыс. Эмӧсь зэв бур статя вӧвъяс. Сэтшӧм вӧвъяссӧ Обласьтувса Земельнӧй Отдел и босьтіс учёт вылӧ — пасъяліс найӧс рӧд паськӧдны. Сӧмын оз на дзикӧдз позь шуны вӧвъяслысь бурлунсӧ стать серти да рӧд серти (происхождение). Колӧ найӧс ещӧ видлыны — тӧдмавны пельклуннысӧ да выннысӧ. Дерт, ылӧссӧ кӧзяиныс ачыс, шуам, и тӧдӧ вӧлыслысь, да мӧдлысь оз тӧд, оз вермы висьтавны, ён-ӧ сылӧн вӧлыс став вӧв сертисӧ.

Миян каргӧгӧрса вӧлӧсьтъясын вель уна Земотдел пасъялӧма кӧбылаясӧс рӧд вылӧ — медбур вӧвъяссӧ став вӧвъяс костсьыс. Найӧс мездісны налогысь, перйисны военнӧй учётысь. Колӧ эськӧ ставныслы налы петавны вензьыны: кымын уна лоас вензьысь — сымын бура ёнджыка вермам тӧдмавны ӧти-мӧдлысь вӧвъяссӧ. Медъён кӧбылаясыслы сетасны награда 5 шайтсянь 20 шайтӧдз — нёль награда.

Агроном Темноев.