ВЫЛЬГОРТЫН

Нывбабаяс оз кӧсйыны дугдыны самӧкур юӧмысь.

Мукӧдлаын, лыддян газетысь да, нывбабаяс быд ногӧн мырсьӧны бырӧдны самӧкур пуӧм да вузалӧм. Выльгортын (Сыктыв уездын) неважӧн на вӧлі нывбаба делегаткаяслӧн чукӧртчылӧм, вӧлӧмаӧсь сэні ӧткымын шыасьысьяс самӧкур йылысь: колӧ пӧ кыдзкӧ дугӧдны самӧкуртӧ пуӧмысь да вузалӧмысь, сы помысь пӧ быдсяма омӧльторйыс овлывлӧ. Унджык нывбабаыс абу сӧгласитчӧмаӧсь дугӧднытӧ; колӧ пӧ неуна пуыштавны аслыным юӧм вылӧ, сытӧг пӧ крестьянинлы овны оз позь.

Татшӧм сёрниыд абу шань. Колӧ мӧд собранньӧ вылын бара на кыпӧдлыны тайӧ сёрнисӧ да кутшӧмкӧ ногӧн босьтчыны ӧтув дугӧдны самӧкур пуӧмтӧ да вузалӧмтӧ, сійӧ ӧд збыльысь уна омӧльтор вӧчӧ олысьясыдлы.

Выльногса пыртчӧм.

1 мартын, школа керкаын вӧлі выль ногӧн пыртчӧм (октябрина), первой на. Пыртісны кага Д. К-лысь. Пуктісны ним «Виль» — дженьмӧдӧм ним Владимир Ильич Ленинлысь. Висьтавлісны «октябрина» вылын выльногса олӧм йылысь. Йӧз вӧлі дзик школа тырыс, он тӧр бергӧдчыны. Октябрина лыддьӧны зэв гажаӧн.

Лӧсьӧдчӧны турун кӧдзны.

Ӧткымын мужикъяс сёрниталӧны воан тулыс турун кӧдзны; лыддьӧмаӧсь нигаысь да, зэв вежыс петӧ видлыны, мый артмас. Сӧмын шогсьӧны, чужан кӧйдыс пӧ оз сюр. Карын пӧ, складын, эськӧ эм да, оз пӧ лӧсьыда чуж, оз лысьтны кӧдзнысӧ. Колӧ эськӧ Земотделлы бурджык кӧйдыс судзӧдны.

Мужик.