КӦНІ КРЕСТЬЯНКАЛЫ ВЕЛӦДЧЫНЫ

Миян коми крестьянка зэв на пемыд. Омӧля на тӧдӧ Сӧвет власьтлысь законъяс, сетӧм праваяс. Оз на унатор ачыс гӧгӧрво. Крестьянкалы колӧ бур отсӧг, туйдалысь, висьтавлысь, индалысь, кыдзи-мый вӧчны, кытчӧ кутшӧм могӧн шыасьны.

Ковмас крестьянкалы — гӧрдармееч гӧтырлы — мужикыс вылӧ пособйӧ корсьны либӧ налогысь кокньӧд корны — сійӧ оз тӧд, кытчӧ шыасьны, кутшӧм гижӧдъяс мыччӧдны. Эновтіс мужикыс крестьянкаӧс посньыдик челядьнас — сьӧкыд овны! Кытысь отсӧг корсьны? А кывліс эз сійӧ: позьӧ пӧ батьсяньыс сьӧм перйыны челядьсӧ быдтыны? Гашкӧ и кывліс эськӧ да, оз тӧд, мый колӧ вӧчны — кытчӧ мунан, кодлы шуан?

Быдтор йылысь крестьянка аддзас туй лыддьысян керкаысь (изба-читальня). Сэні сылы ставсӧ висьталасны, весиг, гашкӧ и, бумага на (заявление) кытчӧ колӧ гижасны. Ӧні ӧд гижныд позьӧ комиӧн, оз ков ёна юртӧ бертлӧдлыны роч мӧвпнад.

Лыддьысян керкаын жӧ крестьянка вермас и велӧдчыны лыддьысьны, гижны. Ӧні рытъяснас прӧст пӧраыд крестьянкалӧн вель на уна эм. Лыддьысян керкаас юралысьыс (избачӧн шусьӧ) вермас сэтчӧ восьтыны гырысьӧс велӧданін.

Гашкӧ эськӧ ӧткымын крестьянкаыс кужӧ и лыддьысьны — том дырйиыс велӧдчывлӧма, — да гортас нигаыс абу. Кытысь босьтан? Нигаяс, газетъяс бара жӧ сюрӧны лыддьысян керкаысь. Эмӧсь бура уна коми нигаяс, эм сэні «Югыд туй» газет; эмӧсь роч журналъяс — ачыд кӧ рочнас он гӧгӧрво, кодкӧ (избачыс либӧ) комиӧн висьталас.

Крестьянкалы сьӧкыда лоӧ овны, сьӧкыд уджсьыс водз воштӧны дзоньвидзалунсӧ. Лыддьысян керкаын и сыысь позьӧ видзчысьны. Позьӧ сэтчӧ корлыны докторӧс либӧ пельшӧрӧс сёрнитны висьӧмъяс йылысь. Найӧ висьталасны: кыдзи колӧ видзчысьны кутшӧм висьӧмысь, кыдзи справитчыны регыдджык. Найӧ жӧ вермасны висьтавны, кыдзи челядьӧс дӧзьӧритны, медым найӧ этшаджык висисны да дзоньвидзаӧн быдмисны.

Лыддьысян керкаын овлӧны уна пӧлӧс кружокъяс. Сэні висьталасны: кыдзи скӧтӧс бурджыка видзны, кыдзи мӧс вермас унджык йӧв сетны, мыйӧн чипанъясӧс вердны, медым унджык колькъялісны, кыдзи капуста гагъяс бырӧдны — быдторсӧ кӧзяйство йылысь.

Сэні жӧ крестьянка тӧдмалас: кыдзи муыс лоӧма, кытысь мортыс лоӧма му вылас, кытісянь енлы веруйтӧмыд лоӧма — кыдзи шуласны, став «светсӧ» пондас тӧдны.

Сэсся лыддьысян керкаын крестьянка велалас-тӧдмалас: кытчӧ нуӧдӧны йӧзӧс Сӧвет власьт да коммунистъяс, кӧні кутшӧма олӧны, кутшӧм оласног миян, кыдзи бӧрйысьӧны Сӧветъяс да мукӧд общественнӧй удж нуӧдысьяс. Сэки сійӧ гӧгӧрвоны пондас да оз нин кисӧ лэпты кулакъясӧс бӧрйӧм вылӧ, казялас, кодъяс тӧждысьӧны уджалысь йӧзлы бур долыд олӧм лӧсьӧдны.

Унатор на крестьянка вермас тӧдны лыддьысян керкаысь. Колӧ сӧмын аслыс частӧджык сэтчӧ пыравлыны да шыасьлыны.

Мун, крестьянка, лыддьысян керкаад, сэні тэнад вежӧрыд югдас!