СССР-са ЦИК-лӧн 3-ӧд СЕССИЯ

Сӧвет правительстволысь удж нуӧдӧмсӧ ошкӧны.

Тифлис. СССР-са ЦИК 3-ӧд сессия вылын Рыков ёрт аслас докладын Сӧвет правительство уджалӧм йылысь шуис: мукӧд государствояс унаӧн ӧні миянӧс пыдди кутісны пуктыны (признали). На пиысь унджыкыс корӧны миянлысь, мед ми мынтысям важ сарӧн вӧчӧм уджйӧзъясысь да мед лыддим сылысь важ кӧсйысьӧмъяссӧ (обязательства). Та вӧсна миянлы мукӧд государствояскӧд политика нуӧдны абу зэв кокни. Сэсся мукӧд государствоса правительствояслы зэв оз кажитчы миян Асыввывса государствояскӧд бура овны лӧсьӧдчӧм. Мукӧд государствояс кост олӧмын ми медъёнасӧ зільны кутам, медым оз пансьы найӧкӧд война.

Сӧвет правительство уджалӧм йылысь сёрнитӧм бӧрын да Рыков ёртӧн бӧръя кыв висьталӧм бӧрын сессия аслас резолюцияын ошкӧ став нуӧдӧм уджсӧ Сӧвет правительствоӧн.

Калинин ёрт аслас важ уджаланінын.

Тифлис. Калинин ёрт воліс Тифлисса кӧрт туй мастерскӧйясӧ, кӧні сійӧ уджавлӧма 25 во сайын. Сэні сюрӧма копияыс гижӧдысь Калинин ёртӧс мастерскӧйысь вӧтлӧм йылысь. Рабочӧйяс собранньӧ вылын шуисны бӧр лыддьыны Калинин ёртӧс сійӧ мастерскӧйса рабочӧйӧн да бура чествуйтісны сійӧс.