КОМИ КРЕСТЬЯНКАЛЫ

Кӧкъямысӧд во нин тэ олан Сӧвет власьт улын.

Кӧкъямысӧд во нин тэнӧ Сӧветса закон праванад ӧткодяліс мужикъяскӧд.

Вайӧ жӧ талун, ставмувывса уджалысь нывбаба праздник лунӧ, видзӧдламӧ: став праванад-ӧ тэ пӧльзуйтчан? Он ӧд? Он, унджыкнас он.

Мый эськӧ мешайтӧ?

Медвойдӧр тэнад аслад пемыдлуныд, абу на ӧнӧдз вермӧмыд вунӧдны (эновтны) важ «праватӧ», важногса праватӧм олӧмтӧ. Тэнӧ кӧ корасны кутшӧмкӧ общественнӧй удж дорӧ, тэ шеныштан кинад да шуан: «Ланьт, эн серав; сэтчӧдз меным делӧ абу; кыдзи нӧ нывбабалы сійӧн бергӧдлыны»...

Коми крестьянка, тӧдан, мый шуліс миян ыджыд велӧдысьным — Ленин ёртным?

Сійӧ пыр шуліс: нывбабаястӧг пӧ бур олӧм (социализм) не вӧчлыны. Мед пӧ весиг быд кухарка велаліс сӧвет удж бергӧдны.

Оз ков тайӧ кывъяссӧ вунӧдны.

Крестьянкалы колӧ эновтны, дзикӧдз орӧдны важногса олӧмсӧ.

Крестьянкалы колӧ тӧдны ставсӧ, мый кӧні вӧчсьӧ.

Крестьянкалы колӧ матыстчыныджык быд общественнӧй уджлань. Крестьянкаӧс виччысьӧ Сельсӧвет; крестьянкатӧг оз кыпты кооператив; крестьянкатӧг омӧля уджалӧ комитет взаимопомощи (мӧда-мӧдлы отсасян комитет); сійӧ колӧ школаса сӧветъясын; сылы колӧ тӧждысьны яслияс да челядь садъяс восьтӧм понда; сылы колӧ велӧдчыны, тӧдны, кыдзи бурджыка кӧзяйство лӧсьӧдны, видз-му уджавны — быдторйӧдз крестьянкалы мог.

Миян став уджалысь йӧз пытшсьыс джынсьыс унджык крестьянкаяс. Ставныс кӧ найӧ пемыдӧсь да пукалӧмӧн виччысьӧны: гашкӧ пӧ кодкӧ быдтор ваяс, — Сӧвет власьтлы сыысь этша пӧльзаыс. Россия пасьтала 40 миллион крестьянкаысь унджык да, сы мындалы Сӧвет власьт оз вермы быдторйӧн отсавны, асьныс кӧ тшӧтш оз кутчысьны выль олӧмас.

Мед жӧ тайӧ луннас и мужик-крестьяниныс мӧвпыштас: кутшӧм бур лоас челядьыслы да сійӧ кӧзяйствоыслы, мамыс кӧ челядьыслӧн да кӧзяйкаыс аслас пемыд, нинӧм оз тӧд? Сы вӧсна колӧ быд крестьянинлы тӧждысьны, медым эськӧ ассьыс гӧтырсӧ да нывъяссӧ югдӧдны, велӧдны, индӧдны найӧс общественнӧй уджъясӧ. Оз ков ӧлӧдны собранньӧяс вылӧ ветлӧмысь — сэтысь некутшӧм омӧль оз ло.

Вайӧ жӧ тайӧ лунас петкӧдлӧй, коми крестьянкаяс, мукӧд уджалысь нывбабаяслы ассьыныд водзмӧстчӧмнытӧ, ассьыныд тайӧ вояснас югдыштӧмнытӧ, общественнӧй удж бердӧ матыстчӧмнытӧ!

Мед жӧ тайӧ праздникыс ещӧ пуктас ӧтик кӧрт асык роботничаясӧс крестьянкаяскӧд топыдджыка ӧтлаасьӧм вылӧ, ӧтвылысь чорыда Ленин туйӧд восьлалӧм вылӧ!